Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 105 Hüküm no: 83 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Lambo’nun oğlu Ziso’nun, Duvarcı Masko ve kardeşi Hıristo aleyhindeki davanın Hurpeşte kazası hakimliğince karara bağlanması Soğukçeşmeli Ahmed Çavuş’a teslîm. Fi’l-asl Rumeli’de Gülükesri sancağı kazâlarından Hurpeşte kazâsı kurâlarından Boğazgo karyesi ahâlîsinden ve Devlet-i aliyye teba‘asının Rum milletinden iken işbu târîh-i i‘lâmdan kırk sene mukaddem fevt olan Dimo v. Yuvan v. Adam’ın verâseti zevce-i metrûkesi Meryem bt. Adam ile sulbî kebîr oğulları Tarandafil ve Yani ve Dimitri ve sulbiye kebîre kızı Lambo’ya münhasıra ba‘dehû merkūm Dimitri dahi işbu târîh-i i‘lâmdan otuz beş sene mukaddem fevt olup verâseti anası merkūme Meryem ile li-ebeveyn er karındaşları merkūmân Tarandafil ve Yani ve li-ebeveyn kız karındaşı merkūme Lambo’ya münhasıra ba‘dehû ibn-i kebîr-i merkūm Yani dahi işbu târîhden otuz sene mukaddem fevt olup verâseti zevcesi diğer Meryem bt. Apostol ile anası merkūme Meryem ve li-ebeveyn er karındaşı Tarandafil ve li-ebeveyn kız karındaşı merkūme Lambo’ya münhasıra ba‘dehû zevce-i merkūme Meryem dahi işbu târîh-i i‘lâmdan yirmi sekiz sene mukaddem fevt olup verâseti sadrî kebîr oğlu merkūm Tarandafil ve sadriye kebîre kızı merkūme Lambo’ya münhasıra ba‘dehâ ibn-i kebîr-i merkūm Tarandafil dahi işbu târîh-i i‘lâmdan yirmi beş sene mukaddem fevt olup verâseti zevcesi Kirano bt. Adam ile sulbî kebîr oğlu Angeli’ye münhasıra ba‘dehû merkūme Lambo dahi işbu târîhden yirmi sene mukaddem fevt olup verâseti sadrî kebîr oğulları Dülger Ziso ve Yorgi’ye ba‘de’l-inhisâr sâhib-i arzuhâl merkūm Ziso mahfil-i şer‘iyyâtda derûn-ı arzuhâlde isimleri mezkûr Devlet-i aliyye teba‘asından ve yine karye-i merkūme ahâlîsinden Duvarcı Masko ve Hıristo ibney Tanaş muvâcehelerinde karye-i mezkûre hudûdu dâhilinde kâin her biri ma‘lûmü’l-hudûd ve’l-müştemilât üç kıt‘a kürûmu mülk bağ ceddimiz ve mûrisimiz müteveffâ-yı evvel-i merkūmun hayâtında ile’l-vefât yedinde müstakillen mülkü ve ba‘de-vefâtihî ber-vech-i münâsaha benimle verese-i sâire-i mezkûresine mevrûs olduğundan mâ‘adâ tereke-i mevcûdesi olan bir aded nühâs kazgan ve beş aded kilim ve üç aded güğüm ve altı aded kadayıf tepsisi ve altı aded tencere ma‘a kapak ve yirmi aded sahan ma‘a kapak ve yedi aded Yanbolu kebesi ve yirmi aded gömlek ve yün memlû on aded baş yasdığı ve yedi aded basma anteri dahi kezâlik ber-mûceb-i münâsaha benimle verese-i sâire-i merkūmesine mevrûs olmuş iken merkūmân Mosko ve Hıristo zikirleri mürûr eden üç kıt‘a mülk bağ ile eşyâ ve evânî-i nühâsiye-i muharrere-i merkūmeyi on iki sene müddetden beri bi’l-ma‘iyye fuzûlî ve bi-gayrı hakkın ahz ve vaz‘-ı yed eder olmalarıyla suâl olunup zikr olunan emlâkdan ve eşyâ-yı muharrere-i mezkûreler mevcûde ise a‘yânından ve müstehleke ise ba‘de’s-sübût kıymet-i şer‘iyyelerinden ber-mûceb-i münâsaha hisse-i ırsiye-i şer‘iyyeme isâbet edeni merkūmân Mosko ve Hıristo[dan] hâlâ taleb ederim deyü ba‘de’d-da‘vâ ve’l-istintâk onlar dahi cevâblarında külliyen inkâr etmeleriyle husûs-ı mezkûr emlâk ve tereke nizâ‘ından ibâret olup mahâllinde erbâb-ı vukūf hâzır oldukları hâlde hakīkat-i hâl bi’l-etrâf tahkīk ve tedkīk ve eşyâ ve evânî-i nühâsiye-i merkūmenin dahi kıymet ve evsâfları tashîh ve âyân kılınarak kazâ-i mezkûr meclisinde huzûr-ı hâkimü’ş-şer‘de bi’l-muvâcehe ber-nehc-i şer‘î lede’t-terâfu‘ ihkāk-ı hak olunmak iktizâ eder mevâddan bulunduğundan tarafeyn mahâllinde huzûr-ı hâkimü’ş-şer‘de vech-i muharrer üzere bi’l-muvâcehe ber-nehc-i şer‘î terâfu‘ ve ihkāk-ı hak olunmak iktizâ eylediği tarafeyne tefhîm olunduğu huzûr-ı [âlîlerine i‘lâm olundu]. Fî 20 Za sene [12]73. Edhem.