Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 107 Hüküm no: 84 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kezman, Fatıma ve Âmine kardeşlerin hamamda kaybolan elbiselerinin bedellerinin Ayasofya Kadınlar Hamamı hademesi Nefise Hanım tarafından tazmin olunması Nüsha-i sâniye Mübâşir-i mezbûra teslîm. İstanbul’da Hocapaşa kurbünde Karaki Hüseyin Çelebi mahâllesinde sâkin iken bundan akdem vefât eden Osman Ağa b. Abdullah’ın sulbiye sagīre kızı Şerîfe Kezman’ın? vâlidesi ve tesviye-i umûruna kıbel-i şer‘den vasiyy-i mansûbesi bâ‘isetü’l-i‘lâm mu‘arrefetü’z-zât Şerîfe Ümmügülsüm bt. Osman nâm hatun vasiyy-i mezbûrenin diğer sadriye [17a] kebîre kızları kezâlik zâtları mu‘arrefeler Şerîfe Fâtıma ve Şerîfe Âmine Hatunlar binteyi’l-mezbûr Osman Ağa hâzıra oldukları hâlde mahfil-i şer‘iyyâtda yine mahâlle-i merkūme sâkinelerinden ve Ayasofya-i kebîr Nisâ Hamamı’nın hademesinden kezâlik mu‘arrefetü’z-zât Şerîfe Nefise Hatun bt. Abdullah muvâcehesinde işbu târîh-i i‘lâmdan yedi gün mukaddem vasîsi olduğum kızım sagīre-i mezbûre ile diğer kızlarım hâzıretân-ı mezbûretândan her biri li-ecli’l-istihmam hamam-ı mezkûre vardıklarında mezbûre Şerîfe Nefise Hatun hamam-ı mezkûrun câmekânında bir mahâl irâe edip kızım sagīre-i mezbûreden malı olup lâbise olduğu mecmû‘u beş yüz yirmi guruş kıymetli bir aded canfes anteri ma‘a şalvar ve bir aded hırka ve bir aded yazma yemenî ve bir zirâ‘ Acem-kârî şal ile diğer kızlarım hâzıretân-ı mezbûretândan mezbûre Şerîfe Fâtıma Hatun malı olup lâbise olduğu mecmû‘u iki yüz on yedi buçuk guruş kıymetli bir aded Merinoz ferâce ve bir çift çedik ve bir aded yaşmak ve mezbûre Şerîfe Âmine Hatun dahi kezâlik malı olup lâbise olduğu mecmû‘u iki yüz on yedi buçuk guruş kıymetli bir aded şalâkî ferâce ve bir aded kaz yaşmak ve bir çift çediğini mezbûre Şerîfe Nefise Hatun ile ma‘an bir boğça derûnuna vaz‘ merkūme Şerîfe Nefise Hatun’un indinde bırakıp hamam-ı mezkûr derûnuna duhûl ve ba‘de’l-iğtisâl hurûc eylediklerinde eşyâ-yı muharrere-i mezkûre mahâll-i mezkûrdan mezbûre Şerîfe Nefise Hatun’un ta‘addî ve taksîrinden nâşî zâyi‘a olmağla vasîsi olduğum kızım sagīre-i mezbûrenin malı olan eşyâ-yı muharrere-i mezkûrenin kıymetleri olan meblağ-ı mezkûr beş yüz yirmi guruşu ben bi’l-asâle ve hâzıretân-ı mezbûretân dahi kezâlik malları olan eşyâ-yı muharrere-i mezkûrenin kıymetleri olan meblağ-ı mezkûr dört yüz otuz beş guruşu dahi hâzıretân-ı mezbûretândan her biri bi’l-asâle mezbûre Şerîfe Nefise Hatun’dan bi-tarîkı’d-damân hâlâ taleb ederiz deyü da‘vâ eylediğimizde mezbûre Şerîfe Nefise Hatun dahi cevâbında eşyâ-yı muharrere-i merkūmeyi ber-vech-i muharrer üzere indinde bulunduğu hâlde ta‘addî ve taksîrinden nâşî zâyi‘a olduğunu ikrâr u i‘tirâf edip ancak mecmû‘-ı eşyâ-yı muharrere-i mezkûrenin kıymetleri cem‘an üç yüz elli beş guruşdur deyü bizim ziyâde altı yüz guruş kıymet müdde‘âmızı ba‘de’l-inkâr, biz ber-minvâl-i meşrûh ziyâde kıymet müdde‘âmızı isbât için kat‘â şâhidlerimiz olmayıp ve mezbûre Şerîfe Nefise Hatun’un dahi yemîn edeceği yakīnen meczûmumuz olup bu sûretde zikri câî sulh vasîsi olduğum sagīre-i mezbûre hakkında her vechile evlâ ve enfa‘ olduğu bi’l-ihbâr lede’ş-şer‘i’l-enver zâhir ve mütehakkık olduğuna binâen ben bi’l-asâle tasaddî eylediğim da‘vâ-i mezkûremden iki yüz guruş ve kızlarım hâzıretân-ı mezbûretân dahi tasaddî eyledikleri da‘vâ-i mezkûrelerinden üç yüz guruş ki cem‘an beşyüz guruş üzerine bâ-tavassut-ı muslihîn mezbûre Şerîfe Nefise Hatun ile sulh olduğumuzda ol dahi sulh-ı mezkûru ba‘de’l-kabûl bedel-i sulh-ı merkūm beş yüz guruşdan mâ‘adâ ziyâde müdde‘âlarına müte‘allıka da‘vâdan ancak hâzıretân-ı mezbûretân merkūme Şerîfe Nefise Hatun’un zimmetini ibrâ-i sahîh-i şer‘î ile kabûlünü hâvî ibrâ ve iskāt eyledik deyü ba‘de’l-ikrâr ve’t-tasâduk ibrâdan müstesnâ bedel-i sulh-ı mezkûrun iki yüz guruşunu sagīre-i mezbûre için müdde‘iye-i vasiye-i mezbûre <<Şerîfe Nefise>> Şerîfe Ümmügülsüm’e ve üç yüz guruşunu dahi hâzıretân-ı mezbûretân Şerîfe Fâtıma ve Şerîfe Âmine Hatunlara bi’t-taleb hâlâ edâ ve teslîme mezbûre Şerîfe Nefise Hatun’a tenbîh olunduğu mübâşirleri Bâb-ı Zabtiye neferâtından Amasyalı Ahmed Ağa kulları yediyle huzûr-ı [âlîlerine i‘lâm olundu]. Fî 21 Z sene [12]73. Mehmed Emin