Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 108 Hüküm no: 85 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah Hatun’un Sarıoğlu Süleyman Ağa aleyhindeki boşanma davasını ispat edemediği Zabtiyeden Çemişgezekli Hasan Kavvâs’a teslîm. İstanbul hısnı ebvâbından Eğrikapı dâhilinde Molla Aşkī mahâllesinde sâkine mu‘arrefetü’z-zât Nimetullah Hatun bt. Ali mahfil-i şer‘iyyâtda hâlâ zevci mahrûse-i Bursa’ya muzâfe Gemlik kazâsına tâbi‘ Kabaklı karyesi ahâlîsinden ve mellâh tâifesinden bâ‘isü’l-i‘lâm Sarıoğlu Süleyman Ağa b. Mustafa muvâcehesinde ben mezbûr Süleyman Ağa’nın beş yüz bir guruş mehr-i müeccel tesmiyesiyle zevce-i menkûha-i medhûlün-bihâsı iken mezbûr Süleyman Ağa işbu sene-i mübâreke Cumâdelâhiresi’nin on üçüncü günü zikr olunan Kabaklı karyesinde vâki‘ sâkin olduğu menzilinde beni talâk-ı selâse ile tatlîk etmekle zimmetinde mütekarrir ve ma‘kūdün-aleyh mehr-i müeccel-i mezkûr hakkım olan beş yüz bir [17b] guruşu hâlâ bana edâya mezbûr Süleyman Ağa’ya tenbîh olunmak murâdımdır deyü ba‘de’d-da‘vâ ve’l-istintâk, ol dahi cevâbında müdde‘iye-i mezbûre Nimetullah Hatun ol mikdâr guruş mehr-i müeccel tesmiyesiyle el-yevm zevce-i menkûha-i medhûlün-bihâsı olduğunu ikrâr u i‘tirâf edip mâ‘adâ müdde‘iye-i mezbûre Nimetullah Hatun’un ber-minvâl-i muharrer talâk müdde‘âsını inkâr etmekle müdde‘iye-i mezbûre Nimetullah Hatun ber-vech-i muharrer talâk müdde‘âsını isbâtdan izhâr-ı acz edip talebiyle mezbûr Süleyman Ağa bi’l-muvâcehe ber-nehc-i şer‘î tahlîf olunmağı mûcebince müdde‘iye-i mezbûre Nimetullah Hatun da‘vâ-i mezkûresiyle zevci mezbûr Süleyman Ağa’ya bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 27 Za sene [12]73. Akif.