Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 109 Hüküm no: 86 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hatice Münire Hatun’un cariyesi Hoşkadem’i azat etmiş olduğundan hürriyetinin tescili Ma‘cûnculu Ali Çavuş’a teslîm şüd. Ma‘rûz, Mukaddemâ rıkka inkıyâdını mukırra ve mu‘terife ve zikri âtî da‘vâya kıbel-i şer‘den mezûne olan sâhibe-i arzuhâl ma‘lûmetü’l-vasf mu‘arrefetü’z-zât Zenciye Hoşkadem bt. Abdullah mahfil-i şer‘iyyâtda mahrûse-i Galata’ya muzâfe kasaba-i Kasımpaşa’da Çatma Mescid mahâllesinde sâkine <> iken işbu sene-i mübâreke Zilhiccetü’ş-şerîfesi’nin ikinci günü vefât eden Hadîce Münire Hatun bt. Ali b. Abdullah’ın verâseti li-ebeveyn kız karındaşı oğlu ve kızı Osman Ağa ve Emine Hatun ibney Musa’ya ba‘de’l-inhisâr câriye-i mevsûfe-i mezbûreye rakīka olup müteveffât-ı mezbûreden kendülere mevrûs olmak zu‘muyla vaz‘-ı yedleri mütehakkık olan derûn-ı arzuhâlde isimleri mezkûr mezbûrân Osman Ağa ve zâtı mu‘arrefe Emine Hatun muvâcehelerinde ben müteveffât-ı mezbûre Hadîce Münire Hatun <> bt. Ali b. Abdullah’ın yedinde rıkka münkāde câriye-i memlûkesi iken müteveffât-ı mezbûre Hadîce Münire Hatun hayâtında ve kemâl-i akl u sıhhatinde işbu sene-i mübâreke şehr-i Ramazan-ı şerîfinin dokuzuncu günü mahâlle-i mezbûrede vâki‘ sâkine olduğu menzilinde mahzar-ı şuhûdda beni cemî‘ malından âzâd ve i‘tâk ve sâir harâir-i asliyât zümresine ilhâk ve idrâc edip ol vechile ben hürriyet-i ârıza ile hürre olmuş iken mezbûrân Osman Ağa ve Emine Hatun bu esnâda câriye olmak zu‘muyla bana bi-gayrı hakkın vaz‘-ı yed eder olmalarıyla suâl olunup vaz‘-ı yedleri men‘ ve sebîlim tahliye olunmak murâdımdır deyü ba‘de’d-da‘vâ ve’l-istintâk mezbûrân Osman ve Emine hatun dahi cevâblarında müdde‘iye-i mevsûfe-i mezbûre Hoşkadem müteveffât-ı mezbûre Hadîce Münire Hatun’un hayâtında ile’l-vefât yedinde rıkka münkāde câriye-i memlûkesi olup ba‘de-vefâtihâ bize mevrûse olmağla ol vechile müdde‘iye-i mevsûfe-i mezbûreye mülk-i mevrûsumuz olmak üzere vaz‘-ı yed ederiz deyü vaz‘ı yedlerini ikrâr lâkin müdde‘iye-i mezbûrenin ber-vech-i muharrer hürriyet-i ârıza müdde‘âsını ba‘de’l-ikrâr müdde‘iye-i mevsûfe-i mezbûre Hoşkadem ber-vech-i muharrer müdde‘âsını her biri mahâllelerinden lede’t-tezkiye adl ve makbûlü’ş-şehâde idükleri ihbâr olunan mahâlle-i mezbûre imamı Hâfız Osman Efendi b. Hasan ve muhtâr-ı evveli Ali Ağa b. Mehmed ve Ali Rıza Bey b. Mustafa ve Çedikçi Mehmed Ağa b. Mustafa ve Kunduracı İbrahim Ağa b. Osman ve berber Memiş Ağa b. Ali nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iye-i mevsûfe-i mezbûrenin ber-vech-i muharrer hürriyetine ba‘de’l-hükm şer‘an sebîli tahliye olunduğu huzûr-ı [âlîlerine i‘lâm olundu]. Fî 18 Z sene [12]73. Hasan.