Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 110 Hüküm no: 87 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin, Hâfız Hasan, Ahmed Ağa ve Osman Ağa aleyhlerindeki alacak iddiasından men olunması Mübâşirine teslîm Tüccârdan es-Seyyid el-Hâc Halil Efendi b. es-Seyyid el-Hâc İbrahim, mahfil-i şer‘iyyâtda İstanbul’da Mahmudpaşa Çarşısı’nda vâki‘ tarakçı esnâfından bâ‘iseyi’l-i‘lâm es-Seyyid Hâfız Hasan Efendi b. Osman ve es-Seyyid Ahmed Ağa b. Salih ve es-Seyyid Osman Ağa b. Ali nâm kimesneler muvâcehelerinde ben işbu târîh-i i‘lâm-ı şer‘î olan Zilhiccetü’ş-şerîfesinin yirmi dokuzuncu günü mezbûrûndan merkūm Hasan Efendi’nin mahâll-i mezkûrda vâki‘ tarakçı dükkânına varıp birkaç aded tarak ve semenini îfâ eylediğim hînde yanında mevcûd üç guruş kıymetli bir aded beyaz kesem derûnunda mevzû‘ malım olan beher adedi yirmişer guruşdan cem‘an bin guruşa mu‘âdil elli aded kavâim-i nakdiyem mezkûr kese ile dükkân-ı mezkûrda kalarak zikr olunan kese ile meblağ-ı merkūmu mezbûrûn es-Seyyid Hâfız Hasan Efendi ve es-Seyyid Ahmed Ağa ve es-Seyyid Osman Ağa’dan her biri bi’l-ma‘iyye ve bi-gayrı hakkın fuzûli ahz ü kabz ve istihlâk etmeleriyle suâl olunup sâlifü’z-zikr kesenin kıymeti olan üç guruş ile kavâim-i nakdiyenin emsâlini bi-tarîkı’d-damân mezbûrûn es-Seyyid Hâfız Hasan Efendi ve es-Seyyid Osman Ağa ve es-Seyyid Ahmed Ağa’dan hâlâ taleb ederim deyü ba‘de’d-da‘vâ ve’l-istintâk ve’l-inkâr mezbûr es-Seyyid el-Hâc Halil Efendi ber-minvâl-i muharrer müdde‘âsını isbâtdan izhâr-ı acz edip talebiyle mezbûrûn es-Seyyid Hâfız Hasan Efendi ve es-Seyyid Ahmed Ağa ve es-Seyyid Osman Ağa’dan her biri bi’l-muvâcehe ber-nehc-i şer‘î başka başka tahlîf olunmağın mûcebince müdde‘î-i merkūm es-Seyyid el-Hâc Halil Efendi da‘vâ-i mezkûresiyle merkūmûn es-Seyyid Hâfız Hasan Efendi ve es-Seyyid Ahmed Ağa ve es-Seyyid Osman Ağa’dan her birine bilâ-beyyine mu‘ârazadan men‘ olunduğu mübâşirleri Bâb-ı Zabtiye neferâtından Kastamonulu Numan Ağa yediyle huzûr-ı [âlîlerine i‘lâm olundu]. Fî-selhi Z sene [12]73. Arif.