Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 111 Hüküm no: 88 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Debbağ esnafı kethüdası İsmail Ağa’nın varislerinin Tüccar Osman Ağa aleyhindeki alacak davalarında anlaşma sağlanması Mübâşirleri Kasımpaşalı Mehmed Kavvâs’a teslîm. Ma‘rûz, Mahrûse-i Galata’ya muzâfe kasaba-i Kasımpaşa’da Kurd Çelebi mahâllesinde sâkin iken yetmiş bir senesi Ramazan-ı şerîfinin yirmi ikinci günü vefât eden Debbâğ esnâfı kethüdâsı el-Hâc İsmail Ağa b. Hasan b. Abdullah’ın verâseti sulbî kebîr oğlu Evkāf-ı hümâyûn Muhâsebesi Kalemi ketebesinden Hâfız Mustafa Efendi ve sulbiye kebîre kızları Âişetü’s-sıdıka ve Hesna Hatunlara münhasıra ve tashîh-i mesele-i mîrâsları dört sehmden olup sihâm-ı mezbûreden iki sehmi ibn-i kebîr-i mezbûr Hâfız Mustafa Efendi’ye ve birer sehmden iki sehmi bintân-ı mezbûretân Âişetü’s-sıdıka ve Hesna Hatunlara isâbeti lede’ş-şer‘i’l-enver zâhir ve mütehakkık oldukdan sonra verese-i mezbûrûndan ibn-i kebîr-i mezbûr Hâfız Mustafa Efendi kendi tarafından asâleten ve kız karındaşları mezbûretân Âişetü’s-sıdıka ve Hesna Hatunlar taraflarından husûs-ı âti’l-beyanda vekîlleri olduğu zâtlarını bi’l-ma‘rifeti’ş-şer‘iyye ârifân esnâf-ı merkūmeden Osman Ağa b. el-Hâc Halil ve Ali Ağa b. Hasan nâm kimesneler şehâdetleriyle bi’l-muvâcehe ber-nehc-i şer‘î sâbit ve sübût-ı vekâletine hükm-i şer‘î lâhık olmağla vekâleten mahfil-i şer‘iyyâtda derûn-ı arzuhâlde mezkûrü’l-ism mukaddemâ tâcir el-Hâc Şerafeddin Ağa b. Ahmed muvâcehesinde pederimiz ve mûrisimiz müteveffâ-yı mezbûrun hayâtında mezbûr el-Hâc Şerafeddin Ağa zimmetinde yedimde olup altmış yedi senesi Cemâziyelûlâsı’nın gurresi günü târîhiyle müverrah bir kıt‘a deyn tahvîli mûcebince malından ve yedinden iştirâ ve kabz eylediği tura ve cins ve evsâfı beynlerinde ma‘lûm kâvsele semeninden alacak hakkı olan sekiz bin guruşun bin yedi yüz guruşunu hayâtında mezbûrûn ahz ü kabz ve istîfâ edip bâkīsi olan altı bin üç yüz guruşu kable’l-ahz ve’l-istîfâ pederim ve mûrisimiz merkūm el-Hâc İsmail Ağa fevt ve meblağ-ı bâkī-i mezkûr altı bin üç yüz guruş benimle müvekkillerim mezbûretâna ber-tashîh-i mezkûr mevrûs olmağla meblağ-ı bâkī-i mezkûr altı bin üç yüz guruşu mezbûr el-Hâc Şerafeddin Ağa’dan <> bi’l-asâle ve bi’l-vekâle taleb ederim deyü tasaddî eylediğim da‘vâmdan bâ-tavassut-ı muslihîn mezbûr el-Hâc Şerafeddin Ağa ile bi’t-tav‘ ve’r-rızâ beş bin beş yüz guruş üzerine bi’l-asâle [18a] ve bi’l-vekâle sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âmıza ve bi’l-cümle husûs-ı mezkûra müte‘allıka da‘vâmdan ben bi’l-asâle ve müvekkillerim mezbûretâna izâfetle bi’l-vekâle mezbûr el-Hâc Şerafeddin Ağa’nın zimmetini, ol dahi kezâlik benimle müvekkilelerim mezbûretânın zimmetlerimizi ibrâ-i sahîh-i şer‘î ile kabûlümüzü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr beş bin beş yüz guruşu müdde‘î-i asıl ve vekîl-i mezbûr Hâfız Mustafa Efendi’ye bi’t-taleb edâ ve teslîme mezbûr el-Hâc Şerafeddin Ağa’ya tenbîh olunduğu huzûr-ı [âlîlerine i‘lâm olundu]. Fî 19 Zilka‘de sene [1]273. Ser-ketebe.