Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 112 Hüküm no: 89 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dağıstanlı Abdülcebbar’ın Dağıstanlı Mehmed aleyhindeki alacak ve eşya iddiası Mübâşirine teslîm. İstanbul’da Vezneciler nâm mahâlde Tuhafcı olan Dağıstanî Abdülcebbar b. Abdülgaffar mahfil-i şer‘iyyâtda teba‘adan Dağıstanî Mehmed b. Himmet muvâcehesinde mezbûr Mehmed bundan akdem malımdan ve yedimden iktirâz ve kabz ve umûruna sarfla istihlâk edip zimmetinde alacak hakkım olan seksen guruş ve işbu târîh-i i‘lâmdan on beş gün mukaddem ben merkūm Mehmed ile Bâb-ı hazret-i Seraskerî’de vâki‘ müsâfirhânede ma‘an sâkin olduğumuz odada malım olan iki yüz guruş nakdim ile mecmû‘u üç yüz elli sekiz guruş kıymetli bir çuka sako ve biri beyaz ve biri aba iki pantolon ve bir fes ve yine cem‘an doksan iki guruş kıymetli bir beyaz pantolon ve yarım vakiye çayımı merkūm Mehmed bi-gayrı hakkın fuzûlî ahz ü kabz edip nakd-i merkūmu bi-gayrı hakkın kendi umûruna sarfla ve eşyâ-yı muharrereyi fuzûlî âhara bey‘ ve teslîmle istihlâk etmekle nakd-i merkūm ile eşyâ-yı muharrere-i mezkûrenin kıymet-i şer‘iyyeleri olan cem‘an dört yüz elli guruşu dahi bi-tarîkı’d-damân mezbûr Mehmed’den hâlâ taleb ederim deyü ba‘de’d-da‘vâ ve’l-istintâk ol dahi cevâbında mârrü’z-zikr çuka sako ve pantolon ve fesi bi-gayrı hakkın fuzûlî ahz ü kabz ve ol mikdâr guruşa âhara bey‘ ve teslîmle istihlâk edip kıymetleri olan meblağ-ı mecmû‘-ı merkūm üç yüz elli sekiz guruş ile meblağ-ı merkūm seksen guruş ki cem‘an dört yüz otuz sekiz guruş müdde‘î-i merkūm Abdülcebbar’a zimmetinde el-yevm deyni olduğunu ikrâr mâ‘adâ müdde‘î-i merkūmun iki yüz guruş nakd ve doksan iki guruş kıymetli bir beyaz pantolon ve yarım vakiye çay müdde‘âsını inkâr etmekle müdde‘-i mezbûr ber-vech-i muharrer mâ‘adâ müdde‘âsını isbâtdan izhâr-ı acz edip tâlib-i tahlîf dahi olmamağla mûcebiyle müdde‘î-i mezbûr mâ‘adâ müdde‘âsıyla merkūm Mehmed’e bilâ-beyyine mu‘ârazadan ba‘de’l-men‘ merkūm Mehmed’in sâlifü’l-beyan ikrâr u i‘tirâfıyla lâzım gelen meblağ-ı mecmû‘-ı mezkûr dört yüz otuz guruşu müdde‘î-i mezbûr Abdülcebbar’a hâlâ ve damânen bi’t-taleb edâ ve teslîme merkūm Mehmed’e tenbîh olunduğu mübâşirleri Bâb-ı Zabtiye neferâtından Amasyalı Ahmed kulları yediyle huzûr-ı [âlîlerine i‘lâm olundu]. Fî 28 Zilhicce sene [12]73. Ahmed.