Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 113 Hüküm no: 90 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un kayıkçı Mehmed Salih Ağa aleyhindeki sarkıntılık davasından men olunması Mübâşirine teslîm. Mahrûse-i Galata’ya muzâfe kasaba-i Beşiktaş mahâllâtından Yenimahalle’de sâkine mu‘arrefetü’z-zât Ümmügülsüm Hatun bt. Mustafa mahfil-i şer‘iyyâtda üveyi pederi kayıkçı esnâfından Mehmed Salih Ağa b. Hüseyin muvâcehesinde müdde‘iye-i mezbûrenin vâlidesi ve mezbûr Mehmed Salih Ağa’nın zevce-i mutallakası kezâlik mu‘arrefetü’z-zât Âişetü’s-sıdıka Hatun bt. Ali hâzıra olduğu hâlde ben ve vâlidem hâzıra-i mezbûre Âişetü’s-sıdıka Hatun ve gāibete ani’l-meclis Asiye Hatun bt. Abdullah işbu târîh-i i‘lâm şehri olan Zilhiccetü’ş-şerîfenin yirmi dördüncü Cuma günü kasaba-i merkūme iskelesinden mezbûr Mehmed Salih Ağa’nın râkib olduğu iki çifte piyâde kayığına binip mezbûr Mehmed Salih Ağa bizi medîne-i Üsküdar’a muzâfe Göksu nâm mahâlle getirip kayık-ı mezkûrdan hurûc ile mahâll-i mezkûrda bir mikdâr geşt ü güzâr ve ârâm ve ba‘dehû mezbûr Mehmed Salih Ağa yevm-i mezkûrda mahâll-i merkūmdan cebren kayık-ı mezkûre bindirip sâ‘at on bir buçuk râddelerinde mahrûse-i mezkûreye muzâfe Büyükdere karyesi önüne götürüp benimle gāibe-i mezbûre Asiye Hatun’a ef‘âl-i şenî‘a kasdıyla üzerimize hücûm ve yaşmak ve ferâcelerimizi nez‘ ve mekşûfetü’l-vech olduğumuz hâlde her bir tarafımızı sıkıp ba‘dehû biz bir takrîble tahlîs olmamızla suâl olunup mûceb-i şer‘îsini mezbûr Mehmed Salih Ağa üzerine icrâ olunmak murâdımdır deyü ba‘de’d-da‘vâ ve’l-istintâk, ol dahi cevâbında müdde‘iye-i mezbûre Ümmügülsüm Hatun’un ber-minvâl-i muharrer müdde‘âsını inkâr etmekle müdde‘iye-i mezbûre Ümmügülsüm Hatun ber-vech-i muharrer müdde‘âsını isbâtdan izhâr-ı acz edip istihlâf etdikde mezbûr Mehmed Salih Ağa bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre Ümmügülsüm Hatun da‘vâ-i mezkûresiyle mezbûr Mehmed Salih Ağa’ya bilâ-beyyine mu‘ârazadan men‘ olunduğu mübâşirleri Bâb-ı Zabtiye neferâtından Arabgirli Şerîf Ağa kulları yediyle huzûr-ı [âlîlerine i‘lâm olundu]. Fî 29 Z sene [12]73. Emin.