Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 116 Hüküm no: 92 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırvat Marko’nun diğer Marko aleyhindeki tazminat davasından men olunması Mübâşirine teslîm Vilâyet-i Rumeli’de İşkodra sancağı dâhilinde vâki‘ Bar kazâsı ahâlîsinden ve Devlet-i aliyye teba‘asının Rum milletinden Bahçıvan Hırvat Marko v. Petro mahfil-i şer‘iyyâtda yine kazâ-i mezkûr ahâlîsinden ve yine teba‘a-i Devlet-i aliyye’den ve millet-i merkūmeden bâ‘isü’l-i‘lâm Rençber diğer Marko v. Kranko muvâcehesinde ismi ma‘lûmum olmayan bir kimesne işbu târîh-i i‘lâmdan yedi sene mukaddem mahrûse-i Galata’ya muzâfe İstinye nâhiyesinde Mirgûnoğlu karyesinde kimesnenin sun‘unsız garîkan vefât etmiş iken işbu merkūm diğer Marko müteveffâ-yı mezbûrun karındaşı ve hasran vârisi olan gāib ani’l-meclis Sava nâm kimesneyi bulup gāib-i merkūm Sava’ya senin karındaşını benim için işbu merkūm Marko katledip bahra ilkā etmişdir deyü husûs-ı mezkûru bana isnâd edip gāib-i mezbûr Sava dahi gerçi huzûr-ı şer‘de benden da‘vâya tasaddî etmemiş ise de ben tezkiye-i nefsim için malımdan ba‘zı mahâllere on iki bin guruş harc ü sarf edip mutazarrır olmamla meblağ-ı masrûf-ı mezkûra mücerred merkūm-ı diğer Ma[r]ko’nun hilâf-ı vâki‘ iftirâsı sebeb olmuş olmağla öyle olucak meblağ-ı masrûf-ı mezkûr on iki bin guruşu bana malından zâmin olmak üzere merkūm-ı diğer Marko’ya cebr ü tenbîh olunmak murâdımdır deyü takrîr-i meşrûhu üzere tasaddî eylediği da‘vâsı lede’l-istiftâ meşrû‘a ve iltifâta şâyân olmadığı müdde‘î-i merkūm Marko’ya tefhîm ve mûcebince da‘vâ-i mezkûresiyle merkūm diğer Marko’ya bî-vech-i şer‘î mu‘ârazadan men‘ olunduğu mübâşirler[i] Bâb-ı Zabtiye neferâtından Manastırlı Osman Ağa yediyle huzûr-ı [âlîlerine i‘lâm olundu]. Fî 9 M sene [12]74. el-Hâc İbrahim.