Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 117 Hüküm no: 93 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Ağa’ya olan borcunu ödemesi hususunda babası Halil Ağa’ya tenbih olunması Kemahlı el-Hâc Mustafa Çavuş’a teslîm. Ma‘rûz, Tabancacı esnâfından bâ‘isü’l-i‘lâm Feyzullah Ağa nâm kimesne mahfil-i şer‘iyyâtda pederi Halil Ağa b. Feyzullah nâm kimesne muvâcehesinde pederim mezbûr Halil Ağa zimmetinde sene-i sâbıkā ya‘ni bin iki yüz yetmiş üç senesi Muharremü’l-haramı’nın on dokuzuncu günü malımdan ve yedimden iktirâz ve kabz ve umûruna sarfla istihlâk eylediği üç yüz guruş alacak hakkım olmağla meblağ-ı mezkûr üç yüz guruşu pederim mezbûr Halil Ağa’dan hâlâ taleb ederim deyü ba‘de’d-da‘vâ ve’l-istintâk ol dahi cevâbında ber-vech-i muharrer ikrâr, lâkin oğlum mezbûr Feyzullah Ağa İstanbul’da Cumartesi Pazarı civârında Hoca Üveys mahâllesinde vâki‘ bi’l-ma‘iyye sâkin olduğumuz menzilde bir mukaffel sandığım derûnunda mevcûd malımdan eyâdî-i nâsda beher adedi yirmişer guruşdan cem‘an bin guruşa mu‘âdil elli aded kavâim-i nakdiyemi mezbûr Feyzullah Ağa fuzûlî ve bi-gayrı hakkın ahz ü kabz etdikden sonra meblağ-ı merkūm bin guruşun altmış guruşunu bundan akdemce bana def‘ ü teslîm edip bâkīsi olan dokuz yüz kırk guruşu bana vermeyip bi-gayrı hakkın kendi umûruna sarfla istihlâk etmekle meblağ-ı bâkī-i merkūm dokuz yüz kırk guruşun üç yüz guruşunu deyn-i mezkûruma takās ve mahsûb olunup bâkīsi olan altı yüz kırk guruşu oğlum mezbûr Feyzullah Ağa’dan bi-tarîkı’d-damân hâlâ taleb ederim deyü mezbûr Feyzullah Ağa’nın inkârına mukārin eylediği da‘vâsını isbâtdan izhâr-ı acz edip talebiyle oğlu mezbûr Feyzullah Ağa bi’l-muvâcehe ber-nehc-i şer‘î tahlîf olunmağın mûcebince mezbûr Halil Ağa da‘vâ-i mezkûresiyle oğlu mezbûr Feyzulah Ağa’ya bilâ-beyyine mu‘ârazadan ba‘de’l-men‘ mezbûr Halil Ağa’nın sâlifü’l-beyan ikrâr u i‘tirâfı üzere lâzım gelen meblağ-ı mezkûr üç yüz guruşun oğlu müdde‘î-i mezbûr Feyzullah Ağa’ya bilâ-habs hâlâ edâ ve teslîmiyle mezbûr Halil Ağa ilzâm olunduğu bi’l-iltimâs huzûr-ı [âlîlerine i‘lâm olundu]. Fî 10 M sene [12]74. Hasan.