Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 118 Hüküm no: 94 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Ali Ağa’nın vefat eden eşi Saide Kadın’ın terekesinden dolayı olan alacağının tahsili talebi Mübâşiri Ayasofyalı Mustafa Çavuş’a teslîm. Mahrûse-i Galata’ya muzâfe kasaba-i Tophane mahâllâtından Firuzağa mahâllesinde sâkine iken işbu târîh-i i‘lâmdan bir ay mukaddem vefât eden Zenciye Saide Kadın bt. Abdullah b. Abdurrahman’ın verâseti zevc[e]-i metrûkü Bâb-ı Zabtiye neferâtından Zenci Ali Ağa b. Abdullah ile müteveffât-ı mezbûrenin mevlâsı mahrûse-i merkūme umûr-ı zabtiyesine memûr Ali Rıza Bey b. Abdullah’a münhasıra ve tashîh-i mesele-i mîrâsları iki sehmden olup sihâm-ı mezkûreden bir sehmi zevc-i mezbûr Ali Ağa’ya ve bir sehmi dahi mevlâsı mûmâ-ileyh Ali Rıza Bey’e isâbeti tahakkukundan sonra vârisân-ı mezbûrândan sâhib-i arzuhâl zevc-i mezbûr Ali Ağa mahfil-i şer‘iyyâtda İstanbul’da Tavşantaşı civârında Kâtibsinan mahâllesinde sâkine derûn-ı arzuhâlde mezkûretü’l-ism mu‘arrefetü’z-zât diğer Saide Hanım bt. İbrahim muvâcehesinde zevcem ve mûrisemiz müteveffât-ı mezbûrenin hayâtında mezbûre diğer Saide Hanım zimmetinde malından ve yedinden iktirâ[z] ve kabz ve umûruna sarfla istihlâk eylediği beş yüz guruş alacak hakkının seksen guruşunu hayâtında kabz ve istîfâ edip bâkīsi olan dört yüz yirmi guruşu kable’l-ahz ve’l-istîfâ fevt ve meblağ-ı bâkī-i mezkûr dört yüz yirmi guruş benimle gāib-ani’l-meclis mûmâ-ileyh Ali Rıza Bey’e ber-tashîh-i mezkûr mevrûs olmağla el-hâletü hâzihi meblağ-ı bâkī-i mezkûr dört yüz yirmi guruşdan tashîh-i mezkûr üzere hisse-i ırsiyeme isâbet eden iki yüz on guruşu mezbûre diğer Saide Hanım’dan <> bi’l-verâse hâlâ taleb ederim deyü ba‘de’d-da‘vâ ve’l-istintâk ol dahi cevâbında ben müteveffât-ı merkūmenin hayâtında malından ve yedinden ancak üç yüz guruş iktirâz ve kabz ve umûruma sarfla istihlâk edip meblağ-ı mezkûr üç yüz guruşun seksen guruşunu kabzını mu‘terif ve mu‘arref olduğu üzere bir def‘a ve iki yüz yirmi guruşunu dahi mu‘ahharan diğer bir def‘a da müteveffât-ı mezbûre Saide Kadın’a hayâtında def‘ ü teslîm etmiş idim deyüb müdde‘î-i mezbûrun inkârına mukārin bu def‘a tasaddî ve müdde‘î-i mezbûrun ziyâde iki yüz guruş karz müdde‘âsını ba‘de’l-inkâr tarafeyn beyana ba‘de’l-havâle dâfi‘a-i mezbûre diğer Saide Hanım ber-minvâl-i muharrer def‘ ve teslîm müdde‘âsını isbâtdan izhâr-ı acz edip talebiyle mezbûr Ali Ağa’ya bi’l-muvâcehe ber-nehc-i şer‘î tahlîf olunmağın mûcebince ancak dâfi‘a-i mezbûre diğer Saide Hanım def‘-i mezkûruyla müdde‘î-i mezbûra bilâ-beyyine mu‘ârazadan ba‘de’l-men‘ mezbûre diğer Saide Hanım’ın ikrâr u i‘tirâfı üzere lâzım gelen meblağ-ı mezkûr iki yüz yirmi guruşdan müdde‘î-i mezbûr Ali Ağa’nın hisse-i ırsiyesine isâbet eden yüz on guruşu müdde‘î-i mezbûr Ali Ağa’ya edâ ve teslîme mezbûre diğer Saide Hanım’a tenbîh olunduğu huzûr-ı [âlîlerine i‘lâm olundu]. Fî 13 M sene [12]74. Ahmed.