Bab Mahkemesi 54 Numaralı Sicil (H. 1102 / M. 1691) cilt: 20, sayfa: 114 Hüküm no: 92 Orijinal metin no: [14b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Mirza varislerinin alacak davasının reddi Medîne-i Sofya’da bundan akdem fevt olan Halil b. Mirza b. Halil nâm kimesnenin verâseti, zevce-i metrûkesi Râbia bt. Abdullah nâm hâtun ile babası mezbûr Mirza’ya ve sulbiye sagīre kızı Fâtıma’ya münhasıra olduğu şer‘an zâhir ve müte‘ayyin oldukdan sonra mezbûr Mirza kendi tarafından asâleten ve sagīre-i mezbûrenin cedd-i sahîhi olmağla velâyeten ve mezbûre Râbia dahi asâleten meclis-i şer‘-i şerîf-i enverde, müteveffâ-yı mezbûrun vasiyy-i muhtârı olan [15a] işbu râfi‘ü’l-kitâb Mustafa Beşe b. Durmuş mahzarında üzerine her biri da‘vâ ve takrîr-i kelâm edip, mezbûr Mustafa Beşe mûrisimiz müteveffâ-yı mezbûrun yanında mevcûd terekesinden on guruş ve zimem-i nâsda olan hukūkundan el-Hâc İbrahim zevcesi Fâtıma Hâtun zimmetinde olan doksan üç guruşu bi’l-vesâye ahz u kabz edip, meblağeyn-i mezbûreyn cem‘an yüz üç guruşun otuz guruşunu getirip bize teslîm, biz dahi ahz u kabz edip, mâ‘adâsı olan yetmiş üç guruşu yedinde kalmağın, hâlâ suâl olunup meblağ-ı mezbûr yetmiş üç guruşun alıverilmesi matlûbumuzdur dedikde, gıbbe’s-suâl mezbûr Mustafa Beşe cevâbında, müteveffâ-yı mezbûrun yanında mevcûd terekesinden on guruş ve mezbûre Fâtıma’dan ancak yirmi guruş ki, cem‘an otuz guruş bi’l-vesâye ahz u kabz ve getirip kendilere teslîm etmişimdir deyu ziyâde kabzını bi’l-külliye inkâr edicek, müdde‘iyân-ı mezbûrândan müdde‘âlarına beyyine taleb olundukda, ityân-ı beyyineden izhâr-ı acz ile istihlâf etmeğin, fi’l-hakīka meblağeyn-i mezbûreyn otuz guruşdan mâ‘adâ müteveffâ-yı mezbûrun hukūkundan mezbûre Fâtıma’dan yetmiş üç guruş dahi bi’l-vesâye ahz u kabz etmeyip, ol vechile meblağ-ı mezbûrun red ve teslîmi üzerine lâzım gelmediğine mezbûr Mustafa Beşe’ye yemîn teklîf olundukda, ol dahi hasbe’l-mes’ûl yemîn billâhi te‘âlâ etmeğin, mûcebince müdde‘iyân-ı mezbûrâna bilâ-beyyine bî-vech mu‘ârazadan men‘ birle, mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Osman Beşe el-mübâşir, İbrahim Çelebi b. Abdullah, Siyavuş b. Abdullah, Mehmed Çelebi b. Ahmed, İbrahim b. Mehmed ve gayruhüm mine’l-hâzırûn.