Bab Mahkemesi 54 Numaralı Sicil (H. 1102 / M. 1691) cilt: 20, sayfa: 114 Hüküm no: 93 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tire beyi Mehmed Bey b. Bayram’ın haksız yere parasını aldığı Abdülbâki Ağa b. Mustafa’yla sulh olduğu Vilâyet-i Anadolu’da medîne-i Tire’de Dürec? mahallesinde sâkin Hüseyin [b.] Mustafa nâm kimesne meclis-i şer‘-i şerîf-i enverde, mahmiye-i İstanbul’da Sarıgez’de sâkin işbu bâ‘isü’l-kitâb umdetü’l-eşbâh Mehmed Bey b. Bayram tarafından husûs-ı âti’l-beyâna vekîl olup Hasan Çelebi b. Mehmed ve Ahmed Ağa b. Receb şehâdetleriyle şer‘an vekâleti sâbite olan Abdülbâki Ağa b. Mustafa nâm kimesne mahzarında ikrâr-ı tâm ve takrîr-i kelâm edip, müvekkil-i mezbûr Mehmed Bey Tire mütesellimi olmağla beni habs edip, bi gayri vech-i şer‘î yüz aded Engürüs altınım ile kıymetleri beynimizde ilm-i şer‘î ile ma‘lûm bir câmeşûy ve ba‘zı eşyâm ahz u kabz etmekle, hâlâ taleb ve da‘vâ eylediğimde beynimizde münâza‘ât-ı kesîre cereyân etmişidi. El-hâletü hâzihî muslihûn tavassut edip, da‘vâ-yı mezkûremden mezbûr Mehmed Bey ile beynimizde on sekiz bin akçe üzerine inşâ-i akd-i sulh olundukda, ben dahi sulh-ı mezbûru kabûl ve bedel-i sulh olan meblağ-ı mezbûr on sekiz bin akçelik mangırımı yedinden alıp kabz edip ve ziyâde[ye] müte‘allika âmme-i da‘vâdan mezkûr Mehmed Bey’i ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d da‘vâ ve nizâ‘ım kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb [olundu]. Fi’l-yevmi’s-sâdis ve’l-ışrîn min Cemâziyelevvel sene 1102. Şuhûdü’l-hâl: Ahmed Çavuş b. Receb, el-Hâc İbrahim Ağa b. Yunus, Hasan Çavuş b. Mustafa, Hüseyin Çavuş b. Ömer.