Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 120 Hüküm no: 96 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine Hanım’ın Ali Efendi’den boşanması Kahvecibaşı Mustafa Ağa kaydıyla Karahisarlı Hariciyeden Halil Kavvâs’a teslîm şüd. Sâhibe-i arzuhâl Âmine Hanım bt. Ömer b. Abdullah tarafından husûs-ı âti’l-beyanda vekîl olduğu zâtını bi’l-ma‘rifeti’ş-şer‘iyye ârifân es-Seyyid Mustafa Talat Efendi b. el-Hâc Süleyman ve Salih Efendi b. Veliyüddin nâm kimesneler şehâdetleriyle bi’l-muvâcehe ber-nehc-i şer‘î sâbit olan İstanbul’da vâki‘ Süleymaniye Câmi‘-i şerîfi hatîbi es-Seyyid el-Hâc eş-Şeyh Hâfız Ali Efendi b. Osman nâm kimesne savb-ı şer‘-i enverden bi’t-taleb mezûnen irsâl olunan eşrâf-ı kuzât-ı kirâmdan Mevlânâ Kâtib el-Hâc İbrahim Edhem Efendi’nin Câmi‘-i şerîf-i mezkûre civârında Sarı Bâyezid mahâllesinde vâki‘ müvekkile-i mezbûrenin zevc-i mutallıkı hâcegân-ı dîvân-ı hümâyûndan ve Mâliye Hazîne-i celîlesinde Rumeli Vâridât [20a] Muhâsebesi ketebesinden Süleyman Galib Efendi b. Ali Şakir Bey’in sâkin olduğu menzilinde cerîdede mazbûtü’l-esâmi Müslimîn huzûrlarında akdeylediği meclis-i şer‘-i münîrde derûn-ı arzuhâlde mezkûrü’l-ism mûmâ-ileyh Süleyman Galib Efendi muvâcehesinde müvekkilem mûmâ-ileyhâ Âmine Hanım mûmâ-ileyh Süleyman Galib Efendinin iki bin guruş mehr-i mu‘accel-i müstevfâ ve iki bin guruş mehr-i müeccel tesmiyeleriyle zevc-i dâhili iken işbu târîh-i i‘lâm günü müvekkilem mûmâ-ileyhâ Âmine Hanım’ı bâyinen tatlîk etmekle zimmetinde mütekarrir ve ma‘kūdün-aleyh mehr-i müeccel-i mezkûr hakkı olan iki bin guruş ile nafaka-i iddet-i mu‘ayyene-i ma‘lûme ve meûnet-i süknâsı mukābelelerinde bi’t-terâzî beynlerinde ta‘yîn olunan beş yüz guruş ki cem‘an iki bin beş yüz guruşu mûmâ-ileyh Süleyman Galib Efendi işbu meclis-i ma‘kūd-ı mezkûrda müvekkilem mûmâ-ileyhâ için bana tamâmen def‘ ü teslîm eylediğinde ben dahi yedinden bi’l-vekâle tamâmen ve kâmilen ahz ü kabz eylediğimden sonra hukūk-ı zevciyete ve müvekkilem mezbûrenin malı olup mûmâ-ileyh Süleyman Galib Efendi fuzûlî ahz ü kabz eyledi deyü inkârına mukārin Efendi-yi mûmâ-ileyhden bi’l-vekâle iddi‘â eylediğim bin iki yüz guruş nakd ile mecmû‘u on bin iki yüz elli guruş kıymetli kırk bir miskāl inci ve şalâkiye kaplı biri teyin ve biri karakulak iki aded kürk ve iki aded işleme köşe yasdığı ve bir yazı çekmecesi ve bir ceviz dolab ve iki aded nühâs süzgeç ve bir bardak da‘vâmdan rızâmla meccânen fâriğ olmamla mutâlebesine ve ibtidâ-yı zevciyetlerinden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvî ve mutâlebât ve kâffe-i eymân ve muhâsamâtdan ben müvekkilem mûmâ-ileyhâya izâfetle bi’l-vekâle mûmâ-ileyh Süleyman Galib Efendi’nin zimmetini, ol dahi kezâlik hukūk-ı zevciyete ve ibtidâ-yı zevciyetden işbu târîhe gelince sâir cemî‘ hukūk-ı şer‘iyyeye müte‘allıka âmme-i de‘âvîden müvekkilem mûmâ-ileyhânın zimmetini tarafeynden her birimiz ibrâ-i âmm-ı sahîh-i şer‘iyye ile ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl eyledik deyü mukırr-ı vekîl-i mezbûr es-Seyyid el-Hâc eş-Şeyh Hâfız Ali Efendi’nin bi’l-cümle takrîr-i meşrûhunu mûmâ-ileyh Süleyman Galib Efendi tahkīk ve tasdîk eylediğini mevlânâ-yı mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr ba‘de’t-tenfîz huzûr-ı [âlîlerine i‘lâm olundu]. Fî 11 M sene [12]74.