Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 121 Hüküm no: 97 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski eşi Mehmed Bey’den boşandıktan sonra iddet müddeti dolmadan Ali Ağa ile evlenen Saide Hanım’ın nikâh akdinin geçersiz olması Kâtib-i mezbûr yediyle es-Seyyid İlyas Bey’e teslîm. Ma‘rûz, İstanbul’da Avratpazarı kurbünde Canbâziye mahâllesinde sâkine zâtı mu‘arrefe Saide Hanım bt. el-Hâc İbrahim cânib-i mahfil-i şer‘iyyâtda Maltepe Hastahânesi cerrâhlarından Ali Ağa b. Kasım muvâcehesinde Hâcegân-ı Dîvân-ı hümâyûn’dan eyâlet-i Yemen vâlisi esbak müteveffâ Sabri Paşazâde rif‘atlü Mehmed Beyefendi hâzır olduğu hâlde ben hâzır-ı mûmâ-ileyh es-Seyyid Mehmed Beyefendi’nin on bin guruş mehr-i müeccel tesmiyesiyle zevce-i menkûha-i medhûlün-bihâsı olup lâkin beynimizde hüsn-i [mu‘âşeret] olmamağla zimmetinde mütekarrir ve ma‘kūdün-aleyh mehr-i müeccel-i mezkûru ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere işbu sene-i mübâreke Cemâziyelâhiresi’nin yirmi yedinci günü bir kıt‘a i‘lâm-ı şer‘î nâtık olduğu üzere hâzır-ı mûmâ-ileyh Mehmed Beyefendi ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru kabûl eyledikden sonra ben hâmil olmayıp hâil olduğum hâlde iddetim münkaziye olmadın nefsimi âhara tezvîc sahîh olur zannıyla mezbûr Ali Ağa’ya târîh-i hul‘dan on iki gün mürûrunda ya‘ni iddetim içinde bin iki yüz elli bir guruş mehr-i müeccel tesmiyesiyle tezvîc, ol dahi bilmeden beni tezevvüc ve vaty edip lâkin akd-i mezbûr kable inkizâi’l-iddet olduğundan şer‘an bâtıl olmağla kıbel-i şer‘den beynimiz tefrîk olunmak murâdımdır deyü hâzır-ı mûmâ-ileyh Mehmed Bey Efendi’nin tasdîkiyle da‘vâ etdikde mezbûr Ali Ağa dahi istintâk olundukda cevâbında kazıyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince mezkûr şer‘an bâtıl olduğuna mebnî kıbel-i şer‘den müdde‘iye-i mezbûre Saide Hanım ile mezbûr Ali Ağa’nın beynleri tefrîk olunduğu tescîl ve bi’l-iltimâs huzûr-ı [âlîlerine i‘lâm olundu]. Fî 21 Z sene [12]73. el-Hâc İbrahim.