Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 122 Hüküm no: 98 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’a olan borcunu ödeyerek eşyalarını rehinden kurtarması hususunda diğer Hatice Hatun’a tenbihte bulunulması Mübâşiri Cihangirli Ahmed Kavvâs’a teslîm Mahrûse-i Galata’ya muzâfe kasaba-i Tophane mahâllâtından Müeyyedzâde Mehmed Efendi mahâllesinde sâkine sâhibe-i arzuhâl mu‘arrefetü’z-zât Hadîce Hatun bt. el-Hâc Yusuf mahfil-i şer‘iyyâtda yine kasaba-i merkūmede Firuzağa mahâllesinde sâkine derûn-ı arzuhâlde mezkûretü’l-ism kezâlik mu‘arrefetü’z-zât diğer Hadîce Hatun bt. Abdullah muvâcehesinde zikr olunan Firuz Ağa mahâllesinde sâkine kezâlik mu‘arrefetü’z-zât Hâce Âişe Hatun bt. Abdullah hâzır olduğu hâlde mezbûre diğer Hadîce Hatun benim malımdan ve hâzıra-i mezbûre Hâce Âişe Hatun yedinden iktirâz ve kabz ve umûruna sarfla istihlâk edip zimmetinde alacak hakkım olan bin beş yüz guruş mukābelesinde mezbûre diğer Hadîce Hatun malından iki bin guruş kıymetli bir çift zümrüd küpe ve bir elmas iğne ve bir gül yüzüğünü yed-i mezbûre ile bana rehin vaz‘ ve teslîm eylediğinde ben dahi yedinden irtihân ve kabz ve kabûl etmemle meblağ-ı merkūm bin beş yüz guruşun dört yüz guruşunu rızâmla hatt ü tenzîl edip meblağ-ı merkūm dört yüz guruşun mutâlebesine müte‘allıka da‘vâdan ben mezbûre diğer Hadîce Hatun’un zimmetini mezbûre diğer Hadîce Hatun dahi inkârıma mukārin benden iddi‘â eylediği iki yüz yirmi guruş müdde‘âsına müte‘allıka da‘vâdan benim zimmetimi tarafeynden her birimiz işbu meclis-i şer‘de kabûlümüzü hâvî ibrâ-i sahîh-i şer‘î ile ibrâ ve iskāt etmemizle bâkīsi olan bin yüz guruşu hâlâ bana edâ birle rihân-ı muharrere-i mezkûreyi rehniyetden fekk ü tahlîse mezbûre diğer Hadîce Hatun’a tenbîh olunmak murâdımdır deyü hâzır-ı mezbûre Hâce Âişe Hatun’un tasdîk ve tevkîliyle da‘vâ etdikde mezbûr diğer Hadîce Hatun dahi istintâk [20b] olundukda cevâbında kazıyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince meblağ-ı bâkī-i mezkûr bin yüz guruşu dahi müdde‘iye-i mezbûre Hadîce Hatun’a edâ ve teslîm birle rihân-ı muharrere-i merkūmeyi rehniyetden fekk ü tahlîse mezbûre diğer Hadîce Hatun’a tenbîh olunduğu huzûr-ı [âlîlerine i‘lâm olundu]. Fî 19 M sene [12]74. Akif.