Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 122 Hüküm no: 99 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damyol v. Nikola’nın İspiro v. Dimitri aleyhindeki arazi davasının Ohri sancağı kadılığınca görüşülmesi Mübâşiri Çarşambalı Ali Çavuş’a teslîm. Nüshateyn Ma‘rûz, Vilâyet-i Rumeli’de Ohri sancağına tâbi‘ Boravis karyesi ahâlîsinden ve Devlet-i aliyye teba‘asının Rum milletinden ekmekçi tablakârı arzuhâl eden Damyol v. Nikola mahfil-i şer‘iyyâtda yine millet-i merkūmeden ve karye-i mezkûre ahâlîsinden derûn-ı arzuhâlde mezkûrü’l-ism ekmekçi tablakârı İspiro v. Dimitri muvâcehesinde yedimde olup sene-i sâbıkā ya‘ni bin iki yüz yetmiş üç senesi Zilka‘detü’ş-şerîfesinin altıncı günü târîhiyle müverrah mahfil-i şer‘iyyâtdan verilen işbu bir kıt‘a i‘lâm-ı şer‘î nâtık olduğu üzere târîh-i i‘lâm-ı mezkûrdan beş sene mukaddem merkūm İspiro’nun malından ve yedinden iktirâz ve kabz ve umûruma sarfla istihlâk edip zimmetimde deynim olan yedi yüz yetmiş beş guruş mukābelesinde arazi-i emîriyeden bâ-temessük-i sâhib-i arz müstakillen mutasarrıf olduğum karye-i merkūme hudûdu dâhilinde kâin her biri lede’l-ahâlî ve’l-cîrân ma‘lûmü’l-hudûd dokuz kıt‘a tarla ve üç kıt‘a çayır yerlerini bilâ-izn-i sâhib-i arz merkūm İspiro’ya kat‘iyyen ferâğ ve teslîm etmiş idim. Lâkin ferâğ-ı mezkûre re’y-i sâhib-i arz munzam olmadığından ferâğ-ı mezkûr şer‘an ve kānûnen sahîh ve mu‘teber olmamağla ben ferâğ-ı mezkûrumdan rücû‘ edip deynim olan meblağ-ı mezkûru yedimden ahz ü kabz birle zikirleri mürûr eden tarlahâ ve çayırlarından keff-i yed ve mahâllerinde bana teslîme merkūm İspiro’ya tenbîh olunmak murâdımdır deyü târîh-i mezkûrda mahfil-i şer‘iyyâtda ba‘de’d-da‘vâ ve’l-inkâr mûcebiyle meblağ-ı karz-ı mezkûr yedi yüz yetmiş beş guruşu yedimden ahz ü kabz birle zikirleri mürûr eden tarlahâ ve çayırlarından keff-i yed ve mahâllerinde bana teslîme merkūm Damyol’a tenbîh olundukdan sonra ben deynim olan meblağ-ı karz-ı mezkûru merkūm Damyol’a tamâmen def‘ ü teslîm eylediğimde, ol dahi yedimden ahz ü kabz ve tarlahâ ve çayırlarını bana redd ü teslîm etmiş idi. Lâkin merkūm Damyol beş sene müddet tarlahâ-yı mezkûreleri zirâ‘at ve hırâset etmekle müddet-i merkūmede noksân-ı arz olan yedi bin beş yüz guruşun bana damânen ve mezkûr çayırlarında benim sakā ve amelimsiz hudâyî nâbit olarak hâsıl olan otu dahi merkūm Damyol kâmilen biçip malı olmak zu‘muyla yedi bin beş yüz guruş semen-i makbûza âhara bey‘le istihlâk etmekle makbûzu olan semen-i meblağ-ı merkūm yedi bin beş yüz guruşu dahi bana edâya merkūm Damyol’a tenbîh olunmak murâdımdır deyü takrîr-i meşrûhu üzere tasaddî eylediği da‘vâlarından evvelen semen-i meblağ-ı mezkûr yedi bin beş yüz guruş da‘vâsı meşrû‘a ve iltifâta şâyân olmadığı müdde‘î-i merkūma ba‘de’t-tefhîm sâniyen noksân-ı arz husûsunda merkūm Damyol istintâk olundukda cevâbında inkâr etmekle bu sûretde husûs-ı mezkûr noksân-ı arz nizâ‘ından ibâret olup bu tarafda tebeyyün eder hâlâtdan olmamağla mahâllinde huzûr-ı hâkimü’ş-şer‘de sâhib-i arz hâzır olduğu hâlde bî-garaz erbâb-ı vukūfdan bi’t-tahkīk vech-i şer‘î üzere terâfu‘ iktizâ eder mevâddan olduğu tarafeyne tefhîm olundukda onlar dahi râzılar olup ber-minvâl-i muharrer mahâllinde terâfu‘ ve ihkāk-ı hakka ittifâk ve ittihâd eyledikleri huzûr-ı [âlîlerine i‘lâm olundu]. Fî-gurreti S sene [12]74. Mustafa.