Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 124 Hüküm no: 100 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Menekşe Kadın ve eşi Said’in Zenci Şirin Kadın aleyhinde eşya ve mücevher iddiasında bulunmaktan men olunmaları Yüksekkaldırımlı Ömer Kavvâs’a teslîm Ma‘rûz, Medîne-i Üsküdar mahâllâtından Arakiyeci el-Hâc Cafer mahâllesinde sâkine sâhibe-i arzuhâl mu‘arrefetü’z-zât Zenciye Menekşe Kadın bt. Abdullah zevci Said b. Abdullah hâzır olduğu hâlde mahfil-i şer‘iyyâtda mahâlle-i merkūmede sâkine derûn-ı arzuhâlde mezkûretü’l-ism kezâlik mu‘arrefetü’z-zât Zenciye Şirin Kadın bt. Abdullah muvâcehesinde ben ve zevcim hâzır-ı mezbûrdan her birimiz mezbûre Şirin Kadın’ın mahâlle-i mezbûrede vâki‘ menzilinde bir müddet müsteciren sâkinler olup ba‘dehû hurûc eylediğimizde zevcim hâzır-ı merkūm Said ile ale’l-iştirâki’s-seviy malımız olup menzil-i mezkûr derûnunda mevcûde olan bin yüz guruşa mu‘âdil on aded Mahmudiye altını ile mecmû‘u on bin guruş kıymetli sîm üzerine masnû‘ tek taşlı bir aded elmas yüzük ve yine sîm üzerine masnû‘ yıldız resminde bir aded elmas iğne ve kıtık memlû iki aded minder ve on iki aded duvar yasdığı ve iki aded yün memlû koltuk yasdığı ve altı aded yüz yasdığı ve beş aded patista pencere perdesi ve bir basma erkân minderi ve üç aded basma yorgan ma‘a çarşeb ve bir değirmi Lahori şal ve bir aded cedîd canfes şalvar ve bir soğuk bez anteri ve üç aded penbe bezi gömlek ve beş aded Patista don ma‘a uçkur ve on aded yazma baş yemenîsi ve bir cedîd fes ve bir yaşmak ve iki çözme çarşeb ve iki peşkir ve altı çevre ve bir çift penbe çorap ve bir şalâkî hırka ve biri basma ve ikisi soğuk bezi cem‘an üç aded nîmten ve bir yazma seccâde ve bir nühâs mangal ve üç tencere ma‘a kapak ve bir pirinç hamam tası ve bir leğen ma‘a ibrik ve beş sahan ma‘a kapak ve bir billûr hoşâb kâsesi ve iki duhân tablası ve bir su maşrabası ve bir fiske şamdânı ve bir câmeşûy leğeni ve bir süzgeç ve bir şorba tası ma‘a kapak ve iki nühâs şamdân tepsisi ve iki pirinç şamdân ve bir et tahtası ve bir satır ve bir tahta dolap ve bir cedîd kaba hasır ve yedi vakiye sabunu mezbûre Şirin Kadın fuzûlî ve bi-gayrı hakkın yedinde alıkomağla zikr olunan altınlar ile huliyyât ve evânî-i nühâsiye ve eşyâ-yı muharrere-i merkūme mevcûde ise a‘yânını ve müstehleke ise ba‘de’s-sübût mezkûr altınların emsâllerini huliyyât ve eşyâ ve evânî-i nühâsiye-i merkūmeninin kıymetleri olan meblağ-ı mecmû‘-ı mezkûr on bin guruşu bi-tarîkı’d-damân benimle zevcem hâzır-ı mezbûra hâlâ edâ ve teslîme ve benim mezbûre Şirin Kadın zimmetinde malımdan ve yedimden iktirâz ve kabz ve umûruna sarfla istihlâk edip alacak hakkım olan bin yetmiş guruşu dahi ancak bana edâ ve îfâya mezbûre Şirin Kadın’a tenbîh olunmak murâdımızdır deyü zevcim hâzır-ı merkūm Said ile ma‘an mezbûre Şirin Kadın’ın yedinde olup bin iki yüz yetmiş iki senesi Zilka‘detü’ş-şerîfesi’nin onuncu günü târîhiyle müverrah ve hâlâ İstanbul Bâb mahkemesi nâibi müderrisîn-i kirâmdan mekremetlü es-Seyyid Mustafa Faik Efendi’nin hatemini hâvî işbu bir kıt‘a i‘lâm-ı şer‘î nâtık olduğu mahkeme-i mezbûrede nâib-i mûmâ-ileyh huzûrunda ma‘kūd meclis-i şer‘de mezbûre Şirin Kadın’dan bey‘ine inkârına mukārin da‘vâ ve müdde‘âmıza isbât-ı beyyineden izhâr-ı [21a] acz edip tahlîfe dahi tâlibler olmamızla mûcebince biz da‘vâ-i mezkûrelerimize mezbûre Şirin Kadın’a bilâ-beyyine mu‘ârazadan men‘ olunmuş idik. El-hâletü hâzihi biz şâhidlerimize zafer bulmamızla zikr olunan altınlar ve huliyyât ve eşyâ ve evânî-i nühâsiye-i muharrere-i merkūme mevcûde ise a‘yânını ve müstehleke ise ba‘de’s-sübût mezkûr altınların emsâlleriyle huliyyât ve eşyâ ve evânî-i nühâsiye-i muharrere-i merkūmenin kıymet-i mezkûrelerini zevcim hâzır-ı mezbûr ile ma‘an bi-tarîkı’d-damân ve meblağ-ı karz-ı mezkûr bin yetmiş guruşu dahi hâlâ ben merkūme Şirin Kadın’dan taleb ederiz deyü yine zevci hâzır-ı mezbûr Said ile bi-aynihî ba‘de’d-da‘vâ ve’l-inkâr müdde‘iyân-ı zevcân-ı mezbûrân ber-minvâl-i muharrer müdde‘âlarını isbâtdan izhâr-ı acz edip yine tahlîfe tâlib olmamalarıyla mûcebince müdde‘iyân-ı zevcân-ı mezbûrân da‘vâ-i mezkûreleriyle mezbûre Şirin Kadın’a ke’l-evvel bilâ-beyyine mu‘ârazadan men‘ olundukları tescîl ve huzûr-ı [âlîlerine i‘lâm olundu]. Fî 23 M sene [12]74. Hasan.