Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 126 Hüküm no: 102 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Abdülkadir Ağa aleyhindeki ev davasının meşru olmadığı Eski Alipaşalı İbrahim Kavvâs’a teslîm, Nüsha-i sâniye Ma‘rûz, İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi civârında vâki‘ el-Hâc Osman’ın hanında sâkin Esirci esnâfından sâhib-i arzuhâl es-Seyyid el-Hâc Ahmed Ağa b. Yunus nâm kimesne mahfil-i şer‘iyyâtda Hayriye tüccârından derûn-ı arzuhâlde mezkûrü’l-ism es-Seyyid Abdülkadir Ağa b. es-Seyyid Ahmed muvâcehesinde vilâyet-i Anadolu’da medîne-i Balıkesrî mahâllâtından Ömer Bey mahâllesinde vâki‘ bir tarafdan el-Hâc Mustafa Ağa menzili ve bir tarafdan Mehmed Ağa menzili ve bir tarafdan Abdullah Ağa bahçesi ve taraf-ı râbi‘i tarîk-i âm ile mahdûd yedimde müstakillen mülk ve hakkım olan müştemilât-ı ma‘lûmeyi hâvî bir bâb mülk menzilimi işbu târîh-i i‘lâmdan iki sene mukaddem Der-aliyye’de han-ı mezkûrda bi’l-îcâb ve’l-kabûl bâtten ve sahîhan dört bin guruş semen tesmiyesiyle işbu hâzır bi’l-meclis mezbûr es-Seyyid Abdülkadir Ağa’ya bey‘ ü temlîk ve mahâllinde zabta taslît eylediğimde ol dahi ber-vech-i muharrer iştirâ ve temellük ve tasallut ve kabûl eylediğinden sonra benim hâlâ medîne-i mezbûrede sâkinler gāibûn ani’l-beled el-Hâc Abdullah Ağa emti‘â-i ma‘lûme esmânından bâ-tahvîl üç bin guruş ve Hocaoğlu Mehmed Emin Ağa’ya cihet-i karzdan bâ-tahvîl beş yüz guruş ve vâlidem Havva Hatun’a beş yüz guruş ki cem‘an dört bin guruş zimmetimde deynim olmağla ben merkūm dört bin guruşu târîh-i mezkûrdan doksan bir gün tamâmında dâyinlerim gāibûn-ı merkūmûna edâ ve teslîme ve tahvîl-i mezkûrları dahi yedlerinden tahlîs ve bana irsâle mezbûr es-Seyyid Abdülkadir Ağa’ya emir ve tarafımdan tevkîl eylediğimde ol dahi ba‘de-kabûli’l-vekâle Dersa‘âdet’den medîne-i mezbûreye varıp menzil-i mahdûd-ı mezkûru zabt ve vaz‘-ı yed edip lâkin semen-i merkūm dört bin guruşu dâyinlerim gāibûn-ı merkūmûna vermeyip ve tahvîl-i mezkûrları dahi yedlerinden tahlîs ve bana irsâl etmediğinden mâ‘adâ menzil-i mahdûd-ı merkūmu dahi medîne-i mezbûre ahâlîsinden Çakaloğlu Ali Ağa b. Abdullah nâm kimesneye semen-i medfû‘ ve makbûza bey‘ ü temlîk ve teslîm, ol dahi ba‘de’l-iştirâ ve’t-temellük ve’t-tesellüm menzil-i merkūma gāib-i mezbûr Ali Ağa el-yevm vâzı‘u’l-yed bulunmuş ise de merkūm es-Seyyid Abdülkadir Ağa mücerred semen-i mezkûru dâyinlerim gāibûn-ı mezbûrûna edâ ve îfâ ve tahvîl-i mezkûrları yedlerinden tahlîs ve bana teslîm etmediğinden mâ‘adâ ben mezbûr es-Seyyid Abdülkadir Ağa ile muahharen Der-aliyye’de bey‘-i mezkûru fesh ü ikāle etmemle binâen-aleyh menzil-i mahdûd-ı mezkûru zi’l-yed bulunan gāib-i mezbûrdan geri ahz ve mahâllinde bana teslîme mezbûr es-Seyyid Abdülkadir Ağa’ya cebre tenbîh olunmak murâdımdır deyü takrîr-i meşrûhu üzere mezbûr Abdülkadir Ağa menzil-i mahdûd-ı mezkûra el-yevm vâzı‘u’l-yed olduğunu mukırr u mu‘terif iken tasaddî eylediği menzil da‘vâsı meşrû‘a ve iltifâta şâyân olmadığı müdde‘î-i mezbûr el-Hâc Ahmed Ağa’ya tefhîm ve mûcebince da‘vâ-i mezkûresiyle mezbûr es-Seyyid Abdülkadir Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 10 M sene [12]74. Akif.