Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 127 Hüküm no: 103 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un annesi Rukıye Hatun ve Saatçi Artin aleyhindeki eşya davasında anlaşma sağlanması Nüsha-i sâniye Mübâşirine teslîm şüd. Ma‘rûz, Medîne-i hazret-i Ebâ-Eyyûbe’l-ensârî -radıye anhü’l-Bârî’de- Defterdâr Ahmed Çelebi mahâllesinde sâkine mu‘arrefetü’z-zât Âişe Hatun bt. Hâfız Ömer mahfil-i şer‘iyyâtda vâlidesi bâ‘isetü’l-i‘lâm kezâlik mu‘arrefetü’z-zât Rukıye Hatun bt. Mehmed Nazif muvâcehesinde sâ‘atçi esnâfından Artin v. Kirhor hâzır olduğu hâlde ben bundan akdem yedimde emvâlim olan mecmû‘u bin yüz doksan guruş kıymetli biri ipek işlemeli bürümcük ve biri dokuma soğuk bez ve biri sâde soğuk ve ikisi hatâyî? cem‘an beş aded anteri ma‘a şalvar ve beş aded hırka ve nîm zirâ‘ Lahori şal ve bir Lahori duhân kesesi ve yün memlû bir minder ve bir billûr bardak ma‘a tabak ve bir aded çalar sâ‘atimi li-ecli’l-hıfz vâlidem mezbûre Rukıye Hatun yedine îdâ‘ ve teslîm eylediğimde ol dahi ber-vech-i muharrer istîdâ‘ ve kabz ve kabûl etdikden sonra eşyâ-yı muharrere-i merkūmeden ancak mârrü’z-zikr çalar sâ‘ati üç yüz otuz guruş semen-i medfû‘ ve makbûza hâzır-ı merkūm Artin’e fuzûlî bey‘ ve teslîm etdiğinde ol dahi ber-vech-i muharrer iştirâ ve kabz edip lâkin ben ba‘de’l-istimâ‘ bey‘-i mezkûru mücîze dahi olmamamla zikr olunan sâ‘ati zi’l-yed olan hâzır-ı merkūm Artin’den ve mâ‘adâsı olan eşyâ-yı muharrere-i mezkûreyi dahi vâlidem mezbûre Rukıye Hatun’dan bi-a‘yânihâ taleb ederim deyü da‘vâ etmiş idim. El-hâletü hâzihi zikr olunan sâ‘at da‘vâmdan rızâmla [21b] meccânen fâriğā olduğumdan sonra vâlidem mezbûre dahi zikirleri mesbûk nîm zirâ‘ Lahor şal ve bir Lahor duhân kesesi ve bir billûr bardak ma‘a tabak aynen yedinde mevcûde malım olarak bi-a‘yânihâ bana redd ü teslîme ba‘de’t-ta‘ahhüd ben zikr olunan şal ve kese ve bardak ve tabakdan mâ‘adâ eşyâ-yı bâkiye-i muharrere-i merkūme da‘vâmdan dahi bâ-tavassut-ı muslihîn vâlidem merkūme Rukıye Hatun ile an-inkâr kat‘â li’n-nizâ‘ iki yüz elli guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûr iki yüz elli guruş ile zikirleri mesbûk nîm zirâ‘ Lahor şal ve bir Lahor duhân kesesi ve bir billûr bardak ma‘a tabakdan mâ‘adâ ziyâde müdde‘âma ve zikr olunan sâ‘at husûsuna müte‘allıka âmme-i de‘âvîden vâlidem mezbûre Rukıye Hatun ile hâzır-ı merkūm Artin’in zimmetlerini ibrâ-i sahîh-i şer‘î ile ibrâ ve iskāt eylediğimde onlar dahi bi’l-cümle husûs-ı mezkûra müte‘allıka da‘vâdan kezâlik benim zimmetimi ibrâ-i sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasâduk ibrâdan müstesnâ bedel-i sulh-ı mezkûr iki yüz elli guruşu nakden ve mârrü’l-beyan nîm zirâ‘ Lahor şal ve bir Lahor duhân kesesi ve bir bardak ma‘a tabağı dahi bi-a‘yânihâ müdde‘iye-i mezbûre Âişe Hatun’a teslîme mezbûre Rukıye Hatun’a tenbîh olunduğu mübâşirleri Bâb-ı Zabtiye neferâtından Erzurumî Ahmed kulları yediyle huzûr-ı [âlîlerine i‘lâm olundu]. Fî 13 M sene [12]74. Nazif.