Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 128 Hüküm no: 104 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Veli Ahmed’in varislerinden Osman’ın diğer varislerden Ahmed ve İsmail aleyhindeki bağ ve tarla davasının meşru olmadığı Paşakapılı Emin Çavuş kaydıyla Yatağançeşmeli Osman Çavuş’a teslîm şüd. Ma‘rûz, Vilâyet-i Anadolu’da Erdek sancağına tâbi‘ Marmara cezîresi kurâsından Evreşe karyesi ahâlîsinden iken işbu târîh-i i‘lâmdan yetmiş sene mukaddem fevt olan Veli Ahmed b. Abdullah b. Abdullah’ın verâseti zevce-i menkûha-i metrûkesi Emine Hatun bt. Abdullah ile sulbî kebîr oğlu Mehmed Ali ve sulbiye kebîre kızları Fâtıma ve diğer Emine hatunlara münhasıra ba‘dehû zevce-i mezbûre Emine Hatun dahi işbu târîh-i i‘lâmdan otuz bir sene mukaddem fevt olup verâseti sulbî kebîr oğlu mezbûr Mehmed Ali ile sulbiye kebîre kızları mezbûretân Fâtıma ve Emine Hatunlara münhasıra ba‘dehâ mezbûre diğer Emine Hatun dahi işbu târîh-i i‘lâmdan otuz sene mukaddem fevt olup verâseti zevc-i metrûkü Abdullah b. Ali li-ebeveyn er karındaşı mezbûr Mehmed Ali ve li-ebeveyn kız karındaşı mezbûre Fâtıma Hatun’a münhasıra ba‘dehâ mezbûre Fâtıma Hatun dahi kezâlik târîh-i i‘lâm-ı merkūmdan on bir sene mukaddem fevt olup verâseti zevc-i metrûku Ali b. Mehmed Sadık ile sulbî kebîr oğulları İsmail ve Mehmed ve Osman’a münhasıra ba‘dehû mezbûr Ali dahi altı sene mukaddem fevt olup verâseti sulbî kebîr oğulları mezbûrûn İsmail ve Mehmed ve Osman’a münhasıra ba‘dehû mezbûr İsmail dahi üç sene mukaddem fevt olup verâseti zevce-i menkûha-i metrûkesi Hadîce Hatun bt. Abdullah ile sulbî sagīr oğlu Mehmed Sadık’a münhasıra ba‘dehû mezbûr Mehmed Ali dahi işbu târîhden üç sene mukaddem fevt olup verâseti zevce-i menkûha-i metrûkesi Emine Hatun bt. Hamza ile sulbî kebîr oğulları Ahmed ve Hüseyin ve İsmail ve sulbiye kebîre kızları Hadîce Refia ve Emetullah Hatunlara inhisârı lede’ş-şer‘i’l-enver zâhir ve mütehakkık oldukdan sonra verese-i mezbûrûndan müteveffât-ı râbi‘a-i mezbûre Fâtıma Hatun’un sadrî kebîr oğlu sâhib-i arzuhâl mezbûr Osman mahfil-i şer‘iyyâtda derûn-ı arzuhâlde isimleri mezkûr müteveffâ-yı sâbi‘-i merkūm Mehmed Ali’nin sulbî kebîr oğulları ve zikri âtî bağ ve tarlaya hâlâ ve müstakillen vaz‘-ı yedleri mütehakkık olan mezbûrân Ahmed ve İsmail muvâcehelerinde karye-i mezbûre hudûdu dâhilinde kâin her biri ma‘lûmü’l-hudûd on bir kıt‘a kürûmu mülk bağ mûrisimiz müteveffâ-yı evvel-i mezbûr Veli Ahmed ile’l-vefât müstakillen yedinde emlâkı olup ba‘de-vefâtihî ber-mûceb-i münâsaha-i mezkûre benimle verese-i sâire-i mezbûrûna mevrûs ve yine karye-i mezbûre hudûdu dâhilinde kâin kezâlik her biri ma‘lûmü’l-hudûd ve’l-cîrân on kıt‘a tarla dahi kezâlik müteveffâ-yı evvel-i merkūm Veli Ahmed’in hayâtında ile’l-vefât bâ-temessükât-ı sâhib-i arz müstakillen taht-ı tasarrufunda olup fevt oldukda tarlahâ-yı mezkûreler dahi ber-mûceb-i kānûn-ı atik-i sultânî ancak oğlu müteveffâ-yı sâbi‘-i merkūm Mehmed Ali’ye hayâtında intikāl-i âdî ile ba‘de’l-intikāl mezbûr Mehmed Ali dahi fevt olup intikālen mutasarrıf olduğu tarlahâ-yı mezkûre sulbî evlâdı işbu mezbûrân Ahmed ve İsmail ve gāib ani’l-beled mezbûr Hüseyin ve benât-ı mezbûrâna âdiyen intikāl edip gerek müteveffâ-yı sâbi‘-i merkūm Mehmed Ali hayâtında ve gerek ba‘de’l-vefât oğulları mezbûrûn zikirleri mesbûk bağlar ile tarlahâ-yı mezkûreye müteveffâ-yı evvel-i merkūm Veli Ahmed’in vefâtından beri mutasarrıflar olup ba‘de-vefâtihî oğulları mezbûrûn el-yevm zabt ve tasarruf edip vâlidem müteveffât-ı râbi‘a-i merkūme Fâtıma Hatun hayâtında ile’l-vefât elli dokuz sene müddet mezbûrûn ile kazâ-i merkūmda sâkinler olup da‘vâ mümkün iken zevci olup müteveffâ-yı hâmis-i mezbûr Ali müsrif ve mübezzir bulunduğundan hisse-i ırsiyesini da‘vâ ve kabz etmiş olsa şâyed yedinden alır mülâhazasıyla da‘vâ etmeyip bilâ-özr-i şer‘î sükût ve terk-i da‘vâ edip ve ba‘de’l-vefât ben dahi on bir sene müddet kezâlik kazâ-i mezkûrda mezbûrûn ile bi’l-ma‘iyye sâkinler olup bu müddetde da‘vâ mümkün iken ben dahi da‘vâ etmeyip bilâ-özr-i şer‘î sükût etmiş idim. El-hâletü hâzihi mezbûrân Ahmed ve İsmail’in vâzı‘u’l-yed oldukları bağ-ı mezkûrlardan ber-mûceb-i münâsaha-i mezkûre hisse-i ırsiyemden ve sâlifü’l-beyan tarlahâ dahî müteveffâ-yı evvel-i merkūm Veli Ahmed hîn-i vefâtında ber-mûceb-i kānûn-ı atik-i sultânî ancak oğlu müteveffâ-yı sâbi‘-i merkūm Mehmed Ali’ye, ol dahi fevt oldukda evlâdları mezbûrûna isdâsen âdiyen intikāl etmiş ise de mücerred bağ-ı mezkûrlar taksîm olunmadığı cihetle tarlahâ-yı mezkûrelerden dahi el-yevm cârî olan kānûn-ı cedîd mûcebince vâlidem müteveffât-ı râbi‘a-i mezbûreye intikāl etmeğin ânın dahi vefâtıyla <> bana intikāl etmek lâzım gelir. Öyle olucak tarlahâ-yı mezkûrenin dahi tis‘a sehim hisse-i şâyi‘asından bâ-re’y-i sâhib-i arz keff-i yed ve mahâllinde bana teslîme mezbûrân Ahmed ve İsmail’e cebr ve tenbîh olunmak matlûbumdur deyü mezbûrân Ahmed ve İsmail’in inkârlarına mukārin tasaddî eylediği da‘vâlarından evvelâ tarlahâ hakkında hisse da‘vâsı mesmû‘a olmadığı kendüye ba‘de’t-tefhîm sâniyen bağ-ı mezkûrlardan hisse-i ırsiye da‘vâsı dahi müdde‘î-i mezbûr Osman ve vâlidesi müteveffât-ı râbi‘a-i mezbûrenin hayâtında elli dokuz sene ve ba‘de’l-vefât kendisi dahi on bir sene ki cem‘an yetmiş sene müddet kazâ-i mezkûrede sâkinler olup bu müddetde da‘vâ [22a] mümkün iken da‘vâ etmeyip bilâ-özr-i şer‘î sükût ve terk-i da‘vâ eylediğini mukırr u mu‘terif iken müdde‘î-i mezbûr Osman’ın da‘vâ-i mezkûresi ber-muktezâ-yı şer‘-i âlî mesmû‘a ve iltifâta şâyân olmayıp ve eylediği i‘tizârı dahi şer‘an vâhî idüğü kendüye tefhîm ve mûcebince da‘vâ-i mezkûreleriyle mezbûrân Ahmed ve İsmail’e bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 7 S sene [12]74. Nazif.