Bab Mahkemesi 54 Numaralı Sicil (H. 1102 / M. 1691) cilt: 20, sayfa: 115 Hüküm no: 94 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Susana bt. Foti’nin Hacı Mahmud b. Durmuş’a olan borcuna karşılık menzilini rehin vermesi Mahmiye-i İstanbul’da Çakırağa mahallesinde sâkine ve zâtı zevci Todori v. Masdi ve Yorgi v. Panayot ta‘rîfleriyle mu‘arrefe olan Susana bt. Foti nâm nasrâniyye meclis-i şer‘-i şerîfde, işbu bâ‘isü’l-kitâb el-Hâc Mahmud b. Durmuş mahzarında ikrâr-ı tâm ve takrîr-i kelâm edip, merkūm el-Hâc Mahmud[‘a] cihet-i deyn-i şer‘îden târih-i kitâbdan bir sene tamâmına değin mev‘ûd ve müeccel yetmiş beş guruş zimmetimde vâcibü’l-edâ deynim olmağla, meblağ-ı mezbûr mukābelesinde meclis-i mezbûrda vâki‘ iki tarafdan Pilaşe menzili ve bir tarafdan Fotini menzili ve bir tarafdan zevcim mezbûr Todori menzili ile mahdûd ve fevkānî ve tahtânî iki oda ve zevcimle müşterek sokak kapısını müştemil mülk menzilimi, fâriğan ani’ş-şevâgil mezbûr el-Hâc Mahmud[‘a] rehin vaz‘ ve teslîm, ol dahi irtihân ve kabz eyledi dedikde, gıbbe’t-tasdîki’l-vicâhî mezbûrenin zevci merhûm Todori ve dâmâdı mezbûr Yorgi meblağ-ı merkūm yetmiş beş guruşa tarafeynden îcâb ve kabûlü hâviye kefâlet-i sahîha [ile] her biri kefîl olmağın, mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel sene 1102. Şuhûdü’l-hâl: Yahya Efendi el-imâm, Ahmed Efendi b. Mehmed, Receb Çelebi b. ( ) el-müezzin, Osman Efendi [b.] İsa, Müezzin İbrahim Çelebi.