Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 130 Hüküm no: 105 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’a kefaletten dolayı olan borcunu ödemesi hususunda Hasan Timur’a tenbih olunması Nevbetbaşı Davudpaşalı Hasan Çavuş kaydıyla Cerrâhpaşalı Cafer Çavuş’a teslîm şüd. İstanbul’da Kaliçacılar Köşkü kurbünde Molla Ali el-Fenârî mahâllesinde sâkine sâhibe-i arzuhâl mu‘arrefetü’z-zât Âişe Hatun bt. Ahmed mahfil-i şer‘iyyâtda fi’l-asl vilâyet-i Anadolu’da Eğin kazâsı ahâlîsinden olup sene-i sâbıkā ya‘ni bin iki yüz yetmiş üç senesi Zilhiccetü’ş-şerîfesinin ikinci günü vefât eden kasab esnâfından Mehmed Şerîf b. Ali b. Hasan’ın li-ebin karındaşı Hasan Timur nâm kimesne muvâcehesinde Bâbıâlî kavvâslarından el-Hâc Mehmed Ağa b. Hüseyin hâzır olduğu hâlde müteveffâ-yı mezbûr Mehmed Şerîf hayâtında yedimde olup sene-i sâbıkā-i mezkûre şehr-i Ramazani’l-mübâreki gurresi târîhiyle müverrah bir kıt‘a temessük nâtık olduğu üzere malımdan ve yedimden iktirâz ve kabz ve umûruna sarfla istihlâk eylediği iki bin guruş ve meblağ-ı mezkûrun bâ-devr-i şer‘î bir senelik ribh-i mülzemi olan üç yüz guruş ki cem‘an alacak hakkım olan iki bin üç yüz guruşa târîh-i temessük-i mezkûrda işbu merkūm Hasan Timur ile hâzır-ı merkūm el-Hâc Mehmed Ağa’dan her biri tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile başka başka kefil ve zâmin olup ve kefâlet-i mezkûrelerini dahi hâmiş-i temessük-i mezkûra tahrîr ve temhîr dahi etdiklerinden sonra meblağ-ı mezkûr iki bin üç yüz guruşu medyûn-ı asıl-ı merkūm Mehmed Şerîf ile kefilân-ı merkūmândan her biri bana kable’l-edâ medyûn-ı asıl-ı mezbûr Mehmed Şerîf verâseti işbu mezbûr Hasan Timur ile zevce-i metrûkesi Fâtıma Hatun bt. Mustafa’ya münhasıra olduğu hâlde fevt olmağla meblağ-ı asl-ı mâl-ı merkūm iki bin guruş ve târîh-i temessük-i mezkûrdan medyûn-ı asıl-ı mezbûrun vefâtı târîhine gelince üç ay iki gün müddetde ribh-i mezkûrdan lâzım gelen yetmiş altı buçuk guruş ki cem‘an iki bin yetmiş altı buçuk guruşu ancak merkūm Hasan Timur’dan kefâlet-i mahkiyesine binâen hâlâ taleb ederim deyü hâzır-ı merkūm el-Hâc Mehmed Ağa’nın ikrâr ve tasdîkiyle da‘vâ eylediğinde ol dahi cevâbında müdde‘iye-i mezbûre Âişe Hatun’un ber-minvâl-i muharrer kefâlet müdde‘âsını inkâr etmekle müdde‘iye-i merkūme Âişe Hatun ber-vech-i meşrûh kefâlet müdde‘âsını her biri mahâllinden lede’t-tezkiye adl ve makbûlü’ş-şehâde idükleri ihbâr olunan mahâlle-i mezbûre muhtârı el-Hâc Mehmed Efendi b. Abdülkadir ve Bâbıâlî kavvâslarından Halil Ağa b. Mehmed Emin nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle meblağ-ı mecmû‘-ı mezkûr iki bin yetmiş altı buçuk guruşu müdde‘iye-i mezbûre Âişe Hatun’a bi-hükmi’l-kefâle bi’t-taleb edâ ve teslîme merkūm Hasan Timur’a tenbîh olunduğu huzûr-ı [âlîlerine i‘lâm olundu]. Fî 7 S sene [12]74. Nazif.