Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 132 Hüküm no: 107 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe Hatun’un, Hesna Hatun ve eşi Halil Ağa aleyhindeki ev davasından men olunması Ma‘rûz, İstanbul’da Yenibahçe kurbünde Kâtib Muslihiddin mahâllesinde sâkin zâtı mu‘arrefe Habibe Hatun bt. Ahmed mahfil-i şer‘iyyâtda yine mahâlle-i mezbûre sâkinelerinden Hesna Hatun bt. Hüseyin b. Abdullah’ın zevci ve tarafından husûs-ı âti’l-beyanda vekîl olduğu zât-ı mezbûreyi bi’l-ma‘rifeti’ş-şer‘iyye ârifân mahâlle-i mezbûre muhtâr-ı sânîsi Mehmed Salih Ağa b. Mehmed ve Çadırcı Mehmed Emin Ağa b. Mehmed nâm kimesneler şehâdetleriyle bi’l-muvâcehe ber-nehc-i şer‘î sâbit ve sübût-ı vekâletine hüküm lâhık olan Halil Ağa b. Mehmed Ali muvâcehesinde mahâlle-i mezbûre imamı es-Seyyid Hâfız Halil Efendi b. es-Seyyid Mustafa hâzır olduğu hâlde hâzır-ı merkūmun yedinde olup sene-i sâbıkā ya‘ni bin iki yüz yetmiş üç senesi Muharremü’l-haramı gurresi târîhiyle müverrah İstanbul Bâb Mahkemesi’nden verilen işbu bir kıt‘a i‘lâm-ı şer‘îde tafsîl ü beyan olunduğu üzere ben ve gāibân ani’l-meclis dâmâdım Berber İsmail b. Mehmed Arif ve kızım Emine Hatun bt. Mehmed Tahir ile ma‘an mahâlle-i merkūmede vâki‘ mutasarrıf olduğumuz menzilimizden hurûc eylediğimiz hînde menzil-i mezkûr derûnunda mevcûd kendi malım olan mecmû‘u bin guruş kıymetli on aded nühâs sahan ve altı sahan kapağı ve bir şorba tası ma‘a kapak ve bir kadayıf tepsisi ve bir tencere ve bir kefkir ve bir maşraba ve bir sagīr karavana ve biri sagīr ve biri kebîr iki şamdân ve sagīr ve kebîr sekiz tabak ve dört billûr bardak ma‘a tabak ve kapak ve iki kahve ibriği ve bir satır ve bir taş havan ve yün memlû bir çift döşek ve bir yeşil ihrâm ve yirmi iki zirâ‘ basma ve iki yazma yemenî ve bir çift çedik ma‘a pabuç ve üç aded çözme çarşebi menzil-i merkūmun bir odasına vaz‘ ve menzil-i mezkûrun miftâhını imam-ı hâzır-ı merkūma emâneten teslîm etmiş iken imam-ı hâzır-ı merkūm es-Seyyid Hâfız Halil Efendi dahi menzil-i mezkûru muahharen asıl ve vekîl-i mezbûr Halil Ağa ile zevcesi ve müvekkilesi mezbûreye fuzûlî icâr ve teslîm, onlar dahi ba‘de’l-isticâr ve’l-kabûl menzil-i mezkûra duhûl etdiklerinden sonra zikr olunan eşyâ ile evânî-i nühâsiye-i muharrere-i mezkûreyi oda-i mezkûreden fuzûlî ve bi-gayrı hakkın ma‘an ahz etmeleriyle suâl olunup eşyâ ve evânî-i nühâsiye-i muharrere-i mezkûre mevcûde ise a‘yânını müstehleke ise ba‘de’s-sübût kıymetleri olan meblağ-ı mecmû‘-ı merkūm bin guruşu asıl ve vekîl-i mezbûr Halil Ağa ile zevcesi ve müvekkilesi mezbûre Hesna Hatun’dan bi-tarîkı’d-damân hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre Habibe Hatun ber-vech-i muharrer müdde‘âsını isbâtdan izhâr-ı acz edip tâlibe-i tahlîf dahi olmamağın mûcebince müdde‘iye-i mezbûre Habibe Hatun da‘vâ-i mezkûresiyle asıl ve vekîl-i mezbûr Halil Ağa ile zevcesi ve müvekkilesi mezbûreye bilâ-beyyine mu‘ârazadan men‘ olunduğu mübâşirleri Bâb-ı Zabtiye neferâtından Beypazarî İbrahim kulları yediyle huzûr-ı [âlîlerine i‘lâm olundu]. Fî 18 S sene [12]74. Nazif.