Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 133 Hüküm no: 108 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Panayot’un Papa Yani aleyhindeki arazi ve alacak davasının Nasliç kazası kadılığınca görüşülmesi Topkapılı Hüseyin Kavvâs kaydıyla mahfil ketebesinden Hâfız Akif’e teslîm şüd. Ma‘rûz Vilâyet-i Rumeli’de Göllükesri sancağına tâbi‘ Nasliç kurâlarından Loğru karyesi ahâlîsinden ve teba‘a-i Devlet-i aliyye’nin Rum milletinden arzuhâl eden Mihal v. el-müteveffâ Panayot v. Adam mahfil-i şer‘iyyâtda karye-i mezkûre ahâlîsinden ve yine teba‘a-i Saltanat-ı seniyyeden ve millet-i merkūmeden derûn-ı arzuhâlde mezkûrü’l-ism Papa Yani v. Kostanti v. Adam muvâcehesinde pederim müteveffâ-yı merkūm Panayot v. Adam’ın sağlığında karye-i mezkûre ahâlîsinden gāib ani’l-beled Rençber Süleyman b. Abdullah nâm kimesneye cihet-i karzdan dört bin dokuz yüz guruş zimmetinde deyni olup meblağ-ı mezkûr dört bin dokuz yüz guruşun bin üç yüz guruşunu hayâtında dâyini gāib-i mezbûra def‘ ü teslîm edip bâkīsi olan üç bin altı yüz guruşu dahi merkūm Papa Yani bundan akdemce babam merkūmun bi-şarti’r-rücû‘ emriyle bi-hükmi’l-kefâle dâyini gāib-i mezbûr Süleyman’a edâ ve teslîm etmekle ol vechile merkūm Papa Yani’nin babam müteveffâ-yı merkūm Panayot zimmetinde bi’l-mürâca‘a alacak hakkım olan meblağ-ı mezkûr üç bin altı yüz guruş mukābelesinde babam müteveffâ-yı merkūm Panayot bâ-tapu müstakillen mutasarrıf olduğu karye-i mezkûr hudûdu dâhilinde vâki‘ bir tarafdan Dimitri tarlası ve iki tarafdan diğer Mihal tarlaları ve taraf-ı râbi‘i tarîk-i âm ile mahdûd üç dönüm mikdârı bir kıt‘a ve yine karye-i mezkûr hudûdu dâhilinde vâki‘ bir tarafdan diğer Yorgi tarlası ve iki tarafdan Yani tarlaları ve taraf-ı râbi‘i tarîk-i âm ile mahdûd beş dönüm mikdârı bir kıt‘a ve yine karye-i mezkûre hudûdu dâhilinde vâki‘ bir tarafdan Kostanti tarlası ve iki tarafdan Dimitri tarlaları ve taraf-ı râbi‘i tarîk-i âm ile mahdûd üç dönüm mikdârı bir kıt‘a ve yine karye-i mezkûre hudûdu dâhilinde vâki‘ bir tarafdan Şomo tarlası ve bir tarafdan Todori tarlası ve bir tarafdan merkūm Yorgi tarlası ve taraf-ı râbi‘i tarîk-i âm ile mahdûd iki dönüm mikdârı bir kıt‘a ve yine karye-i mezkûre hudûdu dâhilinde vâki‘ bir tarafdan merkūm Yorgi tarlası ve iki tarafdan dere ve taraf-ı râbi‘i tarîk-i âm ile mahdûd üç dönüm mikdârı bir kıt‘a ve yine karye-i mezkûre hudûdu dâhilinde vâki‘ bir tarafdan merkūm Yorgi tarlası ve iki tarafdan Nikola tarlaları ve taraf-ı râbi‘i tarîk-i âm ile mahdûd on iki dönüm mikdârı bir kıt‘a ki cem‘an altı kıt‘a tarlalarını merkūm Papa Yani’ye bilâ-izn-i sâhib-i arz rehin vaz‘ ve teslîm eylediğinde ol dahi ber-vech-i muharrer irtihân ve tesellüm ve kabz ve kabûl eylediğinden sonra meblağ-ı bâkī-i merkūm üç bin altı yüz guruşu merkūm Papa Yani’ye kable’l-edâ ve’l-îfâ fevt olup tarlahâ-yı mezkûre ancak bana hasbe’l-kānûn intikāl etmekle el-yevm deyn-i meblağ-ı mezkûr üç bin altı yüz guruşu yedimden kabz birle tarlahâ-yı mezkûreyi bana teslîmden ibâ vü imtinâ‘ eder olmağla suâl olunup meblağ-ı bâkī-i mezkûr üç bin altı yüz guruşu yedimden ahz birle sâlfü’z-zikr altı kıt‘a tarlahâyı mahâllinde bana teslîme merkūm Papa Yani’ye tenbîh olunmak murâdımdır deyü ba‘de’d-da‘vâ ve’l-istintâk merkūm Papa Yani dahi cevâbında müdde‘î-i merkūm Mihal’in babası müteveffâ-yı merkūm Panayot v. Adam sağlığında ber-minvâl-i muharrer mutasarrıfe olduğu zikr olunan altı kıt‘a tarlaları bedel-i misilleriyle bâ-re’y-i sâhib-i arz ferâğ-ı kat‘î-i mu‘teber ile ferâğ ve tefvîz <> ve kabz [ve] bedel-i makbûzunu kendüye teslîme gāib ani’l-beled Devlet-i aliyye’den Nikola v. Yorgi’yi bin iki yüz yetmiş bir senesi Zilhicceti’ş-şerîfesinin gurresinde tarafından bâ-hüccet-i şer‘iyye tevkîl eylediğinde ol dahi ba‘de’l-kabûli’l-vekâle zikr olunan altı kıt‘a tarlaları bedel-i misilleri olan dört bin guruş bedel-i medfû‘ ve makbûl ve müstehlek mukābelesinde bâ-re’y-i sâhib bi’l-vekâle bana [23a] ferâğ-ı kat‘î-i mu‘teber ile ferâğ ve tefvîz ve teslîm eylediğinde ben dahi ber-minvâl-i muharrer teferru‘ ve tefevvüz ve tesellüm ve kabûl etmemle ol vechile sâlifü’z-zikr altı kıt‘a tarlaları tefevvüzen ve müstakillen dâhil-i havza-i tasarrufum olmağla binâen-aleyh bi-hakkın müstakillen zabt ve tasarruf ederim deyü müdde‘î-i merkūmun inkârına mukārin da‘vâ eylediğinde mâ‘adâ bi’l-mürâca‘a alacak hakkım olan meblağ-ı bâkī-i mezkûr üç bin altı yüz guruşu dahi tereke-i müteveffâ-yı merkūmdan olarak oğlu müdde‘î-i merkūmdan hâlâ taleb ederim deyü ba‘de’d-da‘vâ ve’l-inkâr husûs-ı mezkûr arazi nizâ‘ından ibâret ve meblağ-ı bâkī-i mezkûr dahi mahâllinde tedkīke muhtâc mevâddan olduğundan tarafeyn mahâllinde sâhib-i arz hâzır olduğu hâlde bi’l-mürâca‘a ber-nehc-i şer‘î terâfu‘ ve ihkāk-ı hakka bi’r-rızâ ittifâk ve ittihâd eyledikleri huzûr-ı [âlîlerine i‘lâm olundu]. Fî 18 S sene [12]74. Ahmed Arif.