Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 135 Hüküm no: 109 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni milletinden Mıgırdıç’ın Kayıkçı Manak aleyhindeki eşya davasından men olunması Mübâşirine teslîm Fi’l-asl vilâyet-i Rumeli’de Tekfurdağı nâm-ı diğer Rodoscuk kasabası ahâlîsinden ve el-yevm İstanbul hısnı ebvâbından Langa Yenikapısı dâhilinde mütemekkin Devlet-i aliyye teba‘asının Ermeni milletinden Mıgırdıç v. Bedos mahfil-i şer‘iyyâtda yine teba‘a-i merkūmeden ve Ermeni milletinden bâ‘isü’l-i‘lâm kayıkçı Manak v. Karabet muvâcehesinde ben işbu târîh-i i‘lâmdan bir ay mukaddem mahrûse-i Galata’da Kurşunlu Mahzen iskelesinden Bahçekapısı iskelesine gitmek üzere merkūm Manak’ın râkib olduğu piyâde ta‘bîr olunur bir çifte kayığına râkib olarak yedimde malım olup bir aded mukaffel çanta derûnunda mevzû‘ olan mecmû‘u on altı bin yedi yüz altmış beş guruş kıymetli iki aded altın sâ‘at ve dört aded altın halka ve dört aded sîm kaşık ve dört aded miftâh ve bir kalemtraş ve bir kalemdanlık ve elli aded Ermeniyyü’l-imlâ levhaları dahi kayık-ı mezkûr derûnuna vaz‘ eylediğimden sonra kayık-ı mezkûr ile sâlifü’z-zikr Bahçekapısı İskelesi’ne muvâsalat ve iskele-i mezkûreye hurûc eylediğim hînde zikr olunan çanta derûnunda olan sâ‘at ve levha ve kaşık ve halka ve eşyâ-yı sâire-i merkūme kayığın derûnunda kalıp merkūm Manak ahz ü kabz edip yedinde kalmağla suâl olunup cümlesini mevcûde ise bi-a‘yânihâ ve müstehleke ise ba‘de’s-sübût kıymetleri olan meblağ-ı mecmû‘-ı mezkûr on altı bin yedi yüz altmış beş guruşu merkūm Manak’dan bi-tarîkı’d-damân hâlâ taleb ederim deyü ba‘de’d-da‘vâ ve’l-istintâk, ol dahi cevâbında inkâr etmekle müdde‘î-i merkūm Mıgırdıç ber-minvâl-i muharrer müdde‘âsını isbâtdan izhâr-ı acz edip tâlib-i tahlîf dahi olmamağın mûcebince müdde‘î-i merkūm da‘vâ-i mezkûresiyle merkūm Manak’a bilâ-beyyine mu‘ârazadan men‘ olunduğu mübâşirleri Bâb-ı Zabtiye neferâtından Arabgirli Mehmed Ağa kulları yediyle huzûr-ı [âlîlerine i‘lâm olundu]. Fî 17 S sene [12]74. Hasan.