Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 136 Hüküm no: 110 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Yordam’ın yeğeni terzi esnafından Hıristo aleyhindeki alacak davasında anlaşma sağlanması Hademe-i Âsafî’den İsmail Ağa kaydıyla Hocapaşalı Hüseyin Kavvâs’a teslîm Nüsha-i sâniyesi Ma‘rûz, İstanbul’da Samatya nâm mahâlde Merhabaköşesi’nde sâkin Devlet-i aliyye teba‘asının Rum milletinde arzuhâl eden Çarıkçı Panayot v. Yordam mahfil-i şer‘iyyâtda li-ebeveyn kız karındaşı oğlu ve derzi esnâfından derûn-ı arzuhâlde ismi mezkûr Hıristo v. Yanko muvâcehesinde merkūm Hıristo zimmetinde bundan akdem malımdan ve yedimden iktirâz ve kabz ve umûruna sarfla istihlâk edip alacak hakkım olan beş bin altı yüz guruşu merkūm Hıristo’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm Hıristo ile an-inkâr kat‘â li’n-nizâ‘ sekiz yüz guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûr sekiz yüz guruşu merkūm Hıristo işbu meclis-i şer‘de bana tamâmen def‘ ü teslîm eylediğinde ben dahi yedinden ahz ü kabz etmemle ziyâde müdde‘âma ve bi’l-cümle husûs-ı mezkûra müte‘allıka âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü mukırr-ı müdde‘î-i merkūm Panayot’un sâdır olan bi’l-cümle takrîr-i meşrûhunu merkūm Hıristo tahkīk ve tasdîk eylediği tescîl ve huzûr-ı [âlîlerine i‘lâm olundu]. Fî 8 Ra sene [12]74. Mustafa.