Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 137 Hüküm no: 111 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Petro’nun oğlu Nikola’nın, menzil hissesi hakkındaki şüfa iddiasının geçersiz olması Mübâşiri Trabzonî Mehmed Kavvâs’a teslîm Vilâyet-i Rumeli’de İşkodra sancağına tâbi‘ Bar kazâsı kurâsından İsbiç karyesinde sâkin iken işbu târîh-i i‘lâmdan on iki sene mukaddem fevt olan Devlet-i aliyye teba‘asının Rum milletinden Petro v. Yorgi v. Adam’ın verâseti zevce-i metrûkesi Yorice bt. Yorgi ve sulbî kebîr oğulları Nikola ve Covanni ve sulbiye kebîre kızı Cevakoce’ye münhasıra ve tashîh-i mesele-i mîrâsları kırk sehmden olup sihâm-ı merkūmeden beş sehmi zevcesi merkūmeye ve on dörder sehmden cem‘an yirmi sekiz sehmi oğulları merkūmâna ve yedi sehmi dahi kızı merkūmeye isâbeti tahakkukundan sonra sâhib-i arzuhâl ibn-i merkūm Nikola mahfil-i şer‘iyyâtda derûn-ı arzuhâlde mastûrü’l-ism yine teba‘a-i Devlet-i aliyye’den ve Rum milletinden Yuvan v. Andon muvâcehesinde karye-i mezkûrede vâki‘ bir tarafdan Petro v. Beçko v. Adam’ın samanlığı ve bir tarafdan yine merkūmun bahçesi ve bir tarafdan Nikola v. Petro v. Adam menzili ve taraf-ı râbi‘i tarîk-i âm ile mahdûd iki bâb oda ve bir memşâ ve bir mikdâr havlu ve müştemilât-ı sâire-i ma‘lûmeyi hâvî bir bâb mülk menzil babam ve mûrisimiz müteveffâ-yı merkūmun hayâtında ile’l-vefât müstakillen yedinde malı ve mülkü ve ba‘de-vefâtihî benimle anam ve karındaşlarım gāibûn ani’l-beled merkūmûn Yorice ve Covanni ve Cevakoce’ye mevrûs oldukdan sonra anam ve karındaşlarım gāibûn-ı merkūmûn menzil-i mahdûd-ı mezkûrda ırsen mâlik oldukları cem‘an yirmi altı sehim hisse-i şâyi‘a-i ma‘lûmelerini bundan akdem işbu merkūm Yuvan’a iki bin altı yüz guruş semen-i medfû‘ ve makbûza bey‘ ve temlîk ve teslîm eylediklerinde, ol dahi ber-vech-i muharrer iştirâ ve temellük ve tesellüm ve kabz etmiş ise de ben menzil-i mezkûrun cem‘an yirmi altı sehim hissesinde şefî‘ olup lâkin bey‘-i mezkûru istimâ‘ eylediğim hînde taleb-i müvâsebe ve ittihâd-ı şüf‘a etmediğimden mâ‘adâ bu âna değin bilâ-özr-i şer‘î sükût ve terk-i da‘vâ etmiş isem de el-hâletü hâzihi ben menzil-i mahdûd-ı mezkûrda mücerred hissedâr bulunduğuma binâen medfû‘u olan semen-i meblağ-ı mezkûr iki bin altı yüz guruşu yedimden ahz ü kabz birle menzil-i mahdûd-ı mezkûrun yirmi altı sehim hisse-i şâyi‘a-i mezkûresinden keff-i yed [23b] ve mahâllinde bana teslîme merkūm Yuvan’a cebr ve tenbîh olunmak murâdımdır deyü tasaddî eylediği şuf‘a da‘vâsı şerâit-i şuf‘aya ri‘âyet etmediğini mukırr u mu‘terif olduğuna binâen mesmû‘a ve iltifâta şâyân olmadığı müdde‘î-i merkūm Nikola’ya tefhîm ve mûcebince da‘vâ-i mezkûresiyle merkūm Yuvan’a bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 3 Ra sene [12]74. İbrahim.