Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 138 Hüküm no: 112 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın kardeşi Ali Ağa’nın eşi Fatıma Hatun’un mehrinden dolayı kardeşi Ali aleyhindeki alacak iddiasından men olunması Halil Çavuş’a teslîm. Ma‘rûz, Kalafatçı esnâfından Hüseyin Ağa b. Mustafa mahfil-i şer‘iyyâtda li-ebeveyn er karındaşı Ali Ağa b. el-mezbûr Mustafa muvâcehesinde karındaşım mezbûr Ali Ağa’nın bin bir guruş mehr-i mu‘accel ve bin guruş mehr-i müeccel tesmiyeleriyle zevce-i menkûha-i medhûlün-bihâsı olan gāibe-i ani’l-meclis Fâtıma Hatun bt. Mustafa karındaşım mezbûr Ali Ağa’nın zimmetinde mütekarrir ve ma‘kūdün-aleyh mehr-i mu‘accel-i mezkûr hakkı olan bin bir guruşu mezbûr Ali Ağa’dan ba‘de’d-da‘vâ ve’l-ikrâr ve’l-hükm mehr-i mu‘accel-i meblağ-ı mezkûr bin bir guruşun zevce-i gāibe-i mezbûreye edâ ve teslîmiyle karındaşım mezbûr Ali Ağa ilzâm olunduğundan sonra mehr-i mu‘accel-i mahkûmün-bih-i mezkûr bin bir guruşu ben karındaşım mezbûrun bi-şarti’r-rücû‘ emriyle zevcesi gāibe-i mezbûreye malımdan tamâmen edâ ve teslîm etmemle ol vechile meblağ-ı mezkûr bin bir guruşu karındaşım mezbûr Ali Ağa’dan bi’l-mürâca‘a hâlâ taleb ederim deyü ba‘de’d-da‘vâ ve’l-istintâk ol dahi cevâbında inkâr etmekle müdde‘î-i mezbûr Hüseyin Ağa ber-minvâl-i muharrer müdde‘âsını isbâtdan izhâr-ı acz edip ve tahlîfe dahi tâlib olmamağın mûcebince müdde‘î-i mezbûr Hüseyin Ağa ber-minvâl-i muharrer da‘vâ-i mezkûresiyle mezbûr Ali Ağa’ya bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu.] Fî 4 M sene [12]74. Ser-ketebe.