Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 138 Hüküm no: 113 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye Ceyhun’un, sahibi Ahmed Hamid Efendi tarafından azat edildiğine hükmolunması Kâtib-i mezbûra teslîm şüd. Ma‘rûz, Rıkka inkıyâd-ı sâbıkını mukırra ve mu‘terife ve ber-vech-i âtî da‘vâya kıbel-i şer‘-i şerîfden mezûne olan Zenciyetü’l-asl ma‘lûmetü’l-vasf Ceyhun bt. Abdullah mevsûfe-i mezkûrenin mevlâsı Mâliye Hazîne-i celîlesinde Eshâm Muhâsebesi Kalemi ketebesinden bâ‘isü’l-i‘lâm Ahmed Hamid Efendi b. el-müteveffâ Mehmed Rıfat muvâcehesinde ben mezbûr Ahmed Hamid Efendi’nin yedinde rıkka münkāde câriye-i memlûkesi iken mezbûr Ahmed Hamid Efendi işbu târîh-i i‘lâmdan iki sene mukaddem İstanbul’da Sultân Ahmed Han -aleyhi’r-rahmetü ve’l-gufrân- hazretleri câmi‘-i şerîfi civârında Üçler mahâllesinde müsteciren sâkin olduğu menzilinde beni malından âzâd ve i‘tâk ve sâir harâir-i asliyât zümresine ilhâk ve idrâc edip ol vechile ben sâir harâir-i asliyât gibi hürre olmuş iken mezbûr Ahmed Hamid Efendi bi-gayrı hakkın fuzûlî el-yevm bana müdâhale ve vaz‘-ı yed ve âhara bey‘ murâd eder olmağla suâl olunup keff-i yedine tenbîh ve sebîlim tahliye olunmak murâdımdır deyü ba‘de’d-da‘vâ ve’l-istintâk, ol dahi cevâbında ben müdde‘iye-i mevsûfe-i merkūmeyi sulb-i sagīr oğlum işbu hâzır bi’l-meclis Mehmed Reşid nâm sagīrin mâl-ı mevhûbundan iki bin iki yüz elli guruş semen-i medfû‘ ve makbûza velîsi olduğu sagīr-i hâzır-ı mezbûr için âhardan bi’l-velâye iştirâ ve temellük ve tesellüm ve kabz ve kabûl edip ol vechile müdde‘iye-i mevsûfe-i mezbûre benim malım olmayıp velîsi olduğum sagīr-i hâzır-ı mezbûrun şirâen malıdır deyüb müdde‘iye-i mevsûfe-i mezbûrenin ber-minvâl-i muharrer ıtk müdde‘âsını ba‘de’l-inkâr müdde‘iye-i mevsûfe-i zenciye-i mezbûre ber-minvâl-i muharrer ıtık müdde‘âsını isbâtdan izhâr-ı acz edip istihlâf etdikde mezbûr Ahmed Hamid Efendi’ye vech-i şer‘î üzere üç def‘a yemîn teklîf olundukda, ol dahi yemînden nükûl etmeğin mûcebince bu sûretde müdde‘iye-i mevsûfe-i mezbûre Ceyhun’un ıtkına ba‘de’l-hükm şer‘an sebîli tahliye olunduğu huzûr-ı [âlîlerine i‘lâm olundu]. Fî 8 Ra sene [12]74. Karslı Mehmed.