Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 140 Hüküm no: 115 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Hurşid Ağa’nın sepetçi dükkân gediğini Halil Ağa’ya satması Kâtib-i mezbûra teslîm-şüd İhrâc şüd fî 3 R sene [12]76 İstanbul’da Saraçhâne kurbünde Mimar Ayas mahâllesinde sâkin teba‘adan Mehmed Hurşid Ağa b. Abdullah b. Abdullah’ın kayınpederi ve tarafından husûs-ı âti’l-beyanı ikrâra vekîl olduğu mahâlle-i mezbûre imamı es-Seyyid Mehmed Emin Efendi b. Osman ve Sepetçi esnâfından Hüseyin Ağa b. İbrahim nâm kimesneler şehâdetleriyle ber-nehc-i şer‘î sâbit olan esnâf-ı merkūmeden diğer Hüseyin Ağa b. Ali nâm kimesne mahfil-i şer‘iyyâtda yine esnâf-ı merkūmeden işbu bâ‘isü’l-i‘lâm Halil Ağa b. Ali muvâcehesinde bi’l-vekâle takrîr-i kelâm edip dâmâdım müvekkilim mezbûr Mehmed Hurşid Ağa âti’z-zikrin sudûruna değin bâ-hüccet-i şer‘iyye yedimde müstakillen mülküm olan mârrü’l-beyan Saraçhânebaşı’nda Küçük Saraçhâne derûnunda kâin kapıdan duhûl olundukda sol tarafda iki kepenkden ikinci bir kepenk bir bâb sepetçi dükkânı derûnunda mevcûde beyne’l-esnâf gedik ta‘bîr olunur bir destgâh ve üç demir ve sâir âlât-ı lâzıme-i ma‘lûmemi tarafeynden îcâb ve kabûlü hâvî şürut-ı müfsideden ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Halil Ağa’ya bin guruşa bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin guruşu bana tamâmen def‘ ü teslîm eylediğinde ben dahi yedinden bi’t-tamâm ve’l-kemâl ahz ü kabz eyledim, fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp mezbûr Halil Ağa’nın [24a] mülk-i müşterâsı ve hakk-ı sırfı olmuşdur dedi dediğini merkūm Halil Ağa dahi ba‘de’t-tasdîk bâ-irâde-i seniyye gedikât hakkına karârgîr olan nizâm-ı müstahseneye tevfîkan merkūm Halil Ağa ber-minvâl-i muharrer şirâen mâlik olduğu âlât-ı gedik-i mezkûru emsâli misillü evkāf-ı celîle-i hazret-i mülûkâneye terk ve teberru‘ ve icâre-i müeccele takdîriyle taraf-ı vakıfdan ba‘de’l-isticâr zabt ve tasarrufunu hâvî Nezâret-i celîle-i Evkāf-ı hümâyûn’dan yedine bir kıt‘a temessük i‘tâ buyrulmasını istid‘â ve istirhâm eylediği huzûr-ı [âlîlerine i‘lâm olundu]. Fî 8 Ra sene [12]74. Mustafa.