Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 140 Hüküm no: 116 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un eski eşi Salih Efendi aleyhindeki eşya davasından men olunması Kâtib-i mezbûra teslîm. Ma‘rûz, İstanbul’da Çarşamba Pazarı kurbünde Koğacı Dede mahâllesinde sâkine mu‘arrefetü’z-zât Emine Hatun bt. el-Hâc Mehmed mahfil-i şer‘iyyâtda zevc-i sâbıkı müderrisîn-i kirâmdan bâ‘isü’l-i‘lâm es-Seyyid Salih Efendi b. Ali Efendi muvâcehesinde mezbûr es-Seyyid Salih Efendi ile mukaddemâ zevciyet beynimizde kāime iken mezbûr es-Seyyid Salih Efendi’nin Kirmasti mahâllesinde vâki‘ menzilinde mevcûd malım olan mecmû‘u bin altı yüz beş guruş kıymetli bir aded sarı canfes anteri ve bir aded siyâh canfes anteri ve bir aded mor canfes anteri ve bir aded yeşil ipek çubuklu anteri ve bir aded samur kürk ve bir aded siyâh ferâce ve bir aded çalar sâ‘at ve yün memlû on aded mâvi çuka yasdık ve yün memlû üç aded al çuka yasdık ve kıtık memlû beş aded minder ve bir aded nühâs mangal ve bir aded servi sandığı ve bir aded nühâs ta‘âm sinisi hîn-i müfârakatimizde mezbûr es-Seyyid Salih Efendi fuzûlî ve bi-gayrı hakkın yedinde alıkomağla eşyâ-yı muharrere-i mezkûre mevcûde ise a‘yânını ve müstehleke ise ba‘de’s-sübût kıymet-i şer‘iyyesi olan meblağ-ı mezbûr bin altı yüz beş guruş ve efendi-i mezbûrun zimmetinde cihet-i karzdan alacak hakkım olan iki yüz elli guruş ki cem‘an bin sekiz yüz elli beş guruşu bi-tarîkı’d-damân bana hâlâ edâ ve teslîme mezbûr es-Seyyid Salih Efendi’ye tenbîh olunmak murâdımdır deyü ba‘de’d-da‘vâ ve’l-inkâr müdde‘iye-i mezbûre Emine Hatun ber-minvâl-i muharrer müdde‘âlarını isbâtdan izhâr-ı acz edip talebiyle mezbûr es-Seyyid Salih Efendi bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre Emine Hatun da‘vâ-i mezkûreleriyle mezbûr es-Seyyid Salih Efendi’ye bilâ-beyyine mu‘ârazadan men‘ olunduğu bi’l-iltimâs huzûr-ı [âlîlerine i‘lâm olundu]. Fî 4 Ra sene [12]74. Ahmed Arif.