Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 141 Hüküm no: 117 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalafatçı esnafından Hüseyin Ağa’ya ait kayık hissesinin kendisine teslimi hususunda kardeşi Ali Ağa’ya tenbih olunması Ma‘rûz, Kalafatçı esnâfından sâhib-i arzuhâl Hüseyin Ağa b. el-müteveffâ Mustafa Ağa b. Ahmed nâm kimesne mahfil-i şer‘iyyâtda li-ebeveyn er karındaşı esnâf-ı merkūmeden derûn-ı arzuhâlde mezkûrü’l-ism Ali Ağa muvâcehesinde mahrûse-i Galata’da Kalafatyeri iskelesinde merbût örf-i mellâhînde çekdirme ta‘bîr olunur bin beş yüz keyl-i İstanbulî hamûleyi mütehammil bir kıt‘a sefîne babamız ve mûrisimiz mütevefâ-yı mezbûrun hayâtında ile’l-vefât müstakillen yedinde malı ve mülkü ve ba‘de-vefâtihî benimle karındaşım mezbûr Ali Ağa’ya ale’l-iştirâki’s-seviy mevrûs olmuş iken karındaşım mezbûr Ali Ağa sefîne-i merkūmeyi bi-gayrı hakkın fuzûlî ve müstakillen zabt ve hâlâ vaz‘-ı yed eder olmağla suâl olunup sefîne-i mezbûrenin nısf hisse-i şâyi‘asından keff-i yed ve bana teslîme ve ben karındaşım mezbûrun bi-şarti’r-rücû‘ emriyle sefîne-i mezbûrenin iktizâ eden mahâllini malımdan üç bin beş yüz guruş harc ü sarfla meremmet ve tesviye etmemle ol vechile karındaşım mezbûrun zimmetinde bi’l-mürâca‘a alacak hakkım olan meblağ-ı masrûf-ı mezkûr üç bin beş yüz guruşu dahi bana edâya karındaşım mezbûra tenbîh olunmak murâdımdır deyü da‘vâ etdikde mezbûr Ali Ağa dahi cevâbında sefîne-i merkūme babaları müteveffâ-yı mezbûrun ile’l-vefât müstakillen malı ve mülkü ve ba‘de-vefâtihî kendisiyle müdde‘î-i mezbûr Hüseyin Ağa’ya mevrûs olduğunu ve sefîne-i merkūmeye kendinin el-yevm müstakillen vaz‘-ı yedini ikrâr mâ‘adâ müdde‘î-i mezbûrun ber-vech-i muharrer masrûf müdde‘âsını ba‘de’l-inkâr müdde‘î Hüseyin Ağa ber-vech-i meşrûh masrûf müdde‘âsını isbâtdan izhâr-ı acz edip talebiyle mezbûr Ali Ağa bi’l-muvâcehe ber-nehc-i şer‘î tahlîf olunmağın mûcebince merkūm Hüseyin Ağa masârıf-ı mezkûre müdde‘âsıyla mezbûr Ali Ağa’ya bilâ-beyyine mu‘ârazadan ba‘de’l-men‘ merkūm Ali Ağa’nın sâlifü’l-beyan ikrâr u i‘tirâfı mûcebince sefîne-i mezbûrenin nısf hisse-i şâyi‘asından keff-i [yed] ve karındaşı müdde‘î-i mezbûr Hüseyin Ağa’ya vech-i lâyıkı üzere teslîme mezbûr Ali Ağa’ya tenbîh olunduğu huzûr-ı [âlîlerine i‘lâm olundu]. Fî 4 M sene [12]74. Ser-ketebe