Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 142 Hüküm no: 118 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayriye Tüccarından Mehmed Abdüllatif Bey çocuğunun annesi olan cariyesi Cezbidil’i azat etmesi Nüsha-i sâniye Ma‘rûz, Mahrûse-i Galata’ya muzâfe İstinye nâhiyesine tâbi‘ Bebek nâm-ı diğer Hümâyûnâbâd karyesi ahâlîsinden ve Hayriye tüccârından Mehmed Abdüllatif Bey b. Abdurrahman mahfil-i şer‘iyyâtda ümm-i veledi olup İstanbul’da Lâleli Câmi‘-i şerîfi kurbünde Balaban Ağa mahâllesinde sâkine bâ‘isü’l-i‘lâm orta boylu kara kaşlı kara gözlü Yezîdiyyü’l-asl Cezbidil bt. Abdullah muvâcehesinde mevsûfe-i mezbûre Cezbidil Kadın yedimde rıkka münkāde câriye-i memlûkem iken mevsûfe-i mezbûre Cezbidil Kadın’ı bundan akdem istifrâş ve ahyâl? eylediğimden sonra işbu târîh-i i‘lâmdan sekiz ay mukaddem firâşımdan hâsıl mevsûfe-i mezbûreden bir veled-i zeker tevellüd edip Abdurrahman tesmiye olunup veled-i mezkûr yedindedir deyü da‘vet dahi eylediğimden sonra veled-i mezkûr sekiz gün mürûrunda fevt olmuş idi. El-hâletü hâzihi ben ümm-i veledim olan mevsûfe-i mezbûre Cezbidil Kadın’ı hasbeten lillâhi te‘âlâ ve taleben li-merzâti Rabbi’l-a‘lâ malımdan âzâd ve i‘tâk ve sâir harâir-i asliyât zümresine ilhâk ve idrâc edip ol vechile mevsûfe-i mezbûre Cezbidil Kadın sâir harâir-i asliyât gibi hürre olup üzerinde hakk-ı velâdan gayrı hakkım yokdur dedikde mukırr-ı mezbûr Mehmed Abdüllatif Bey’in sâdır olan bi’l-cümle takrîr-i meşrûhunu mevsûfe-i mezbûre Cezbidil Kadın tasdîk eylediği mübâşirleri Bâb-ı Zabtiye çavuşlarından Mehmed Çavuş mübâşeretiyle bi’l-iltimâs huzûr-ı [âlîlerine i‘lâm olundu]. Fî 4 R sene [12]74. Ahmed Arif.