Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 143 Hüküm no: 119 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdarlı Edhem Efendi’nin, Amasyalı Osman Ağa aleyhindeki alacak iddiasında anlaşma sağlanması Nüsha-i sâniye, Kahveci-i hazret-i veliyyü’n-ni‘amî Mehmed Ağa’ya teslîm. Anadolu eşrâf-ı kuzâtından Dobniçe kazâsı nâibi sâbık bâ‘isü’l-i‘lâm Üsküdarlı İbrahim Edhem Efendi b. Mehmed Tevfik mahfil-i şer‘iyyâtda teba‘adan Amasyavî Osman Ağa b. Hasan muvâcehesinde mezbûr Osman Ağa zimmetinde yedime verdiği bin iki yüz altmış sekiz senesi Şa‘bâni’l-mu‘azzamı gurresi târîhyle müverrah ve işbu bir kıt‘a deyn tahvîli mantûkunca malımdan ve yedimden iktirâz ve kabz ve umûruna sarfla istihlâk edip zimmetinde alacak hakkım olan dört bin guruşu merkūm Osman Ağa’dan taleb ederim deyü tasaddî eylediğim da‘vâmdan bâ-tavassut-ı muslihîn mezbûr Osman Ağa ile kat‘â li’n-nizâ‘ ve ref‘an li’l-husûme iki bin beş yüz guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve sâir cemî‘ hukūk-ı şer‘iyyeye müte‘allıka âmme-i de‘âvî ve kâffe-i mutâlebâtdan merkūm Osman Ağa’nın zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ben seninle beher şehr yüz elli guruş ücret mukāvelesiyle bin iki yüz altmış iki senesi Şa‘bâni’l-mu‘azzamı’nın yirmi yedinci gününden bin iki yüz yetmiş iki senesi Zilhiccetü’ş-şerîfesinin yirmi yedinci gününe gelince yüz yirmi dört mâh müddet sana ber-mu‘tâd hizmet ve ba‘dehû mufârakat etmemle müddet-i mezkûre ecr-i müsemmâ-yı mezkûremden zimmetinde müctemi‘ alacak hakkım olan on sekiz bin altı yüz guruşu senden taleb ederim deyü tasaddî eylediği da‘vâsından rızâsıyla [24b] meccânen fâriğ olmağla mutâlebesine ve bi’l-cümle husûs-ı mezkûre ve sâir cemî‘ hukūk-ı şer‘iyyeye müte‘allıka âmme-i de‘âvî ve kâffe-i mutâlebâtdan kezâlik benim zimmetimi ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-minvâl-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki bin beş yüz guruşun müdde‘î-i mezbûr İbrahim Edhem Efendi’ye bi’t-taleb edâ ve teslîme mezbûr Osman Ağa’ya tenbîh olunduğu bi’l-iltimâs huzûr-ı [âlîlerine i‘lâm olundu]. Fî 11 R sene [12]74. Mustafa.