Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 144 Hüküm no: 120 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Küçük Ahmed Bey aleyhindeki arazi davasının meşru olmadığı Nüsha-i sâniye Mübâşiri Kırkçeşmeli Hacı Ömer Çavuşa Teslîm Ma‘rûz, Vilâyet-i Rumeli’de Tekfurdağı nâm-ı diğer Rodoscuk kazâsı ahâlîsinden sâhib-i arzuhâl İbrahim Ağa b. Mehmed nâm kimesne mahfil-i şer‘iyyâtda kazâ-i mezbûr vücûhundan Rikâb-ı hümâyûn-ı şâhâne kapıcıbaşılarından derûn-ı arzuhâlde mezkûrü’l-ism el-Hâc Küçük Ahmed Bey b. Ali muvâcehesinde ben işbu târîh-i i‘lâmdan on sene mukaddem mûmâ-ileyh Ahmed Bey’in malından ve yedinden iktirâz ve kabz ve umûruma sarfla istihlâk eylediğim sekiz yüz guruş zimmetimde deynim mukābelesinde kazâ-i mezbûra tâbi‘ Pazar karyesi hudûdu dâhilinde kâin taht-ı tasarrufumda olan her biri lede’l-ahâlî ve’l-cîrân ma‘lûmü’l-hudûd altı kıt‘a tarlaları iki kıt‘a temessük ile rehin olmak üzere mîr-i mûmâ-ileyh yedine teslîm eylediğimden sonra deynim olan meblağ-ı mezkûr sekiz yüz guruşu dahi mûmâ-ileyh Ahmed Bey’e tamâmen edâ ve îfâ eylediğimde, ol dahi yedimden ahz ve kabz ve istîfâ etmiş iken zikr olunan tarlahâ ve temessükleri bana redd ü teslîm etmeyip temessük-i mezkûrlar yedinde kaldığına binâen zikirleri mürûr eden altı kıt‘a tarlayı hâlâ karye-i mezbûre sâkinlerinden gāibân ani’l-beled Veli Mehmed b. Ahmed ile sulbî kebîr oğlu Nasuh’a bedel-i ma‘lûm ve medfû‘ ve makbûza re’y-i sâhib-i arzla emr ü tevkîlimsiz fuzûlî ferâğ ve tefvîz ü teslîm, onlar dahi seviyyen tefevvüz ve tesellüm ve kabz ü kabûl ve el-yevm vaz‘-ı yed ve tasarruf ederler ise de mücerred tarlahâ-yı mezkûreyi mûmâ-ileyh Ahmed Bey gāibân-ı mezbûrâna fâriğ olduğuna binâen yine gāibân-ı merkūmândan geri tefevvüz ve mahâllinde bana teslîme mûmâ-ileyh Ahmed Bey’e cebr ü tenbîh olunmak murâdımdır deyü tasaddî eylediği da‘vâsı tarlahâ-yı mezkûreye mîr-i mûmâ-ileyhin vâzı‘u’l-yed olmadığını mukırr u mu‘terif iken mesmû‘a ve iltifâta şâyân olmadığı ve tarlahâ-yı merkūmeyi mahâllinde zi’l-yed bulunan gāibân-ı merkūmândan sâhib-i arz huzûrunda da‘vâ etmek iktizâ edeceği müdde‘î-i merkūm İbrahim Ağa’ya tefhîm ve mûcebince da‘vâ-i mezkûresiyle mûmâ-ileyh el-Hâc Ahmed Bey’e bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu.] Fî 6 R sene [12]74. Nazif.