Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 145 Hüküm no: 121 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayriye Tüccarı’ndan Ali Ağa’nın Naip Ebubekir Sıdkı Efendi aleyhindeki alacak iddiasında anlaşma sağlanması Mübâşirine teslîm şüd. Vilâyet-i Anadolu’da Bolu sancağına tâbi‘ Ereğli kazâsı ahâlîsinden ve Hayriye tüccârından bâ‘isü’l-i‘lâm Ali Ağa b. Halil mahfil-i şer‘iyyâtda hâlâ kazâ-i mezkûr nâibi olup bu esnâda li-ecli’l-maslaha Âsitâne-i aliyye’ye gelen Ebubekir Sıdkı Efendi b. Hasan muvâcehesinde benim li-ebeveyn er karındaşım olan hâlâ kazâ-i mezkûrda sâkin Halil nâm kimesneye zimmetinde hukūk-ı sahîha-i şer‘iyyeden deynim olan on bin guruşu karındaşım mezbûr Halil kazâ-i mezkûr mahkemesinde Efendi-yi mûmâ-ileyhin huzûrunda ma‘kūd meclis-i şer‘de benden da‘vâ ve benimle bi’t-tav‘ ve’r-rızâ yedi bin guruş bedel-i medfû‘ ve makbûz üzerine sulh olduğu hînde mûmâ-ileyh Ebubekir Sıdkı Efendi resim nâmında benden fuzûlî ve bi-gayrı hakkın sekiz yüz yirmi beş guruş ahz ü kabz ve umûruna sarfla istihlâk etmiş idi. El-hâletü hâzihi medfû‘um olan meblağ-ı mezkûr sekiz yüz yirmi beş guruşu mûmâ-ileyh Ebubekir Sıdkı Efendi’den bi-tarîkı’d-damân hâlâ taleb ederim deyü tasaddî eylediğim da‘vâmdan bâ-tavassut-ı muslihîn mûmâ-ileyh Ebubekir Sıdkı Efendi ile bi’t-tav‘ ve’r-rızâ yedi yüz elli guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yedi yüz elli guruşu müdde‘î-i merkūm Ali Ağa’ya edâ ve teslîme mûmâ-ileyh Ebubekir Sıdkı Efendi’ye tenbîh olunduğu mübâşirleri Bâb-ı Zabtiye neferâtından Arabgirî Şerîf Ağa kulları yediyle huzûr-ı [âlîlerine i‘lâm olundu]. Fî 14 R sene [12]74.