Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 145 Hüküm no: 122 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalafatçı esnafından Hüseyin Ağa’nın vefat eden annesi Ümmügülsüm’de olan alacağının terekesinden tahsil olunması talebi Arabgirli Halil Çavuş’a teslîm Ma‘rûz, Mahrûse-i Galata’ya muzâfe kasaba-i Tophane’de Defterdâr Ebulfazl mahâllesinde sâkine iken bundan akdem vefât eden Ümmügülsüm Hatun bt. Mehmed b. Abdullah’ın verâseti sadrî kebîr oğulları Kalafatçı esnâfından Hüseyin Ağa ve Ali Ağa ibneyi’l-müteveffâ Mustafa b. Mehmed Arif’e ba‘de’l-inhisâr vârisân-ı mezbûrândan bâ‘isü’l-i‘lâm mezbûr Hüseyin Ağa mahfil-i şer‘iyyâtda mezbûr Hüseyin Ağa’nın li-ebeveyn er karındaşı olup tereke-i vâfiye-i müteveffât-ı mezbûreye müstakillen vaz‘-ı yedi zâhir ve mütehakkık olan mezbûr Ali Ağa muvâcehesinde vâlidemiz müteveffât-ı mezbûre Ümmügülsüm Hatun hayâtında yedimde olup bin iki yüz altmış yedi senesi Cemâziyelâhiresi’nin yirmi sekizinci günü târîhiyle müverraha ve ol târîhde askerî kassâmı bulunan sudûr-ı izâmdan semâhatlü Ahmed Şükrü Efendi hazretlerinin imzâ ve hatemini hâviye işbu bir kıt‘a idâne hücceti nâtıka olduğu üzere İstanbul’da Kumkapı dâhilinde Nişâncıpaşa-i atik mahâllesinde sâkin iken bundan [akdem] vefât eden Hatîb Mustafa Efendi’nin sulbî sagīr oğlu Mehmed Niyazi ve sulbiye sagīre kızı Hadîce’nin mallarından vâlideleri ve tesviye-i emirlerine vasiyy-i mansûbeleri gāibetü ani’l-meclis Zeyneb Hanım bt. Ahmed yedinden istidâne ve kabz ve umûruna sarfla istihlâk eylediği iki bin guruş ile meblağ-ı merkūmun iki senelik bâ-devr-i şer‘î ilzâm-ı ribhi olan altı yüz guruş ki cem‘an iki bin altı yüz guruş deynine ben ve pederim müteveffâ-yı mezbûr Mustafa Ağa’dan her birimiz tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile müte‘âkiben kefil bi’l-mâl ve zâminler olup ve her birimiz ber-vech-i muharrer âharın zimmetine kefâlet hasebiyle lâzım gelen deynimize dahi kezâlik tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile kefil ve zâmin olduğumuzdan ve pederim müteveffâ-yı mezbûr Mustafa Ağa dahi fevt oldukdan sonra nemâ-i merkūmun ancak dört yüz guruşunu vâlidemiz medyûne-i asil-i müteveffât-ı mezbûre Ümmügülsüm Hatun vasiyy-i gāibe-i mezbûreye edâ ve îfâ edip bâkīsi olan iki bin iki yüz guruşu kable’l-îfâ fevt oldukdan sonra vasiyy-i gāibe-i merkūme Zeyneb Hanım meblağ-ı bâkī-i merkūm iki bin iki yüz guruşu bi-hükmi’l-kefâle benden mutâlebe ve tamâmen ahz ü kabz edip ve hüccet-i merkūmenin kaydı dahi sicill-i mahfuzdan terkīn olunmuş idi. El-hâletü hâzihi vâlidemiz müteveffât-ı mezbûre Ümmügülsüm Hatun meblağ-ı bâkī-i mezkûr iki bin iki yüz guruşu bana kable’l-edâ ve’l-îfâ fevt olup tereke-i vâfiye-i müteveffât-ı mezbûreye karındaşım mezbûr Ali Ağa müstakillen vaz‘-ı yed etmekle suâl olunup meblağ-ı mekfûlün-bih-i bâkī-i mezkûr iki bin iki yüz guruşu vâzı‘u’l-yed olduğu tereke-i vâfiye-i [25a] müteveffât-ı mezbûreden olarak evvel emirde hâlâ ve tamâmen bana edâ ve teslîme karındaşım mezbûra tenbîh olunmak murâdımdır deyü ba‘de’d-da‘vâ ve’l-istintâk ol dahi cevâbında kazıyye minvâl-i muharrer üzere olduğunu ve mazmûn-ı hüccet-i mezkûreyi bi-tamâmihî tâyi‘an ve kat‘iyyen ikrâr u i‘tirâf etmeğin mûcebince meblağ-ı mekfûlün-bih-i bâkī-i mezkûr iki bin iki yüz guruşu tereke-i vâfiye-i müteveffât-ı mezbûreden olarak müdde‘î-i mezbûr Hüseyin Ağa’ya edâ ve teslîme karındaşı mezbûr Ali Ağa’ya tenbîh olunduğu huzûr-ı [âlîlerine i‘lâm olundu]. Fî 21 M sene [12]74. Akif.