Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 147 Hüküm no: 123 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Rıfat Efendi’nin Halatçılar Kethüdası Mustafa’nın eşi Kâmile Hatun aleyhindeki alacak davasında anlaşma sağlanması Mübâşiri Fenerli Süleyman Kavvâs’a teslîm Ma‘rûz, Mâliye Hazîne-i celîlesinde Mektûbî Odası hulefâsından sâhib-i arzuhâl Mehmed Rıfat Efendi b. Mehmed Âşir mahfil-i şer‘iyyâtda İstanbul’da Süleymaniye Câmi‘-i şerîfi kurbünde Samanviran-ı evvel mahâllesinde sâkine müteveffâ Halatçılar Kethüdâsı Hacı Mustafa Ağa zevcesi demekle arîfe [ve] derûn-ı arzuhâlde mezkûretü’l- ism Kâmile Hatun bt. el-Hâc Mehmed b. Lutfullah tarafından husûs-ı âti’l-beyanda sulh ve ibrâya vekâlet-i âmme-i mutlakā-i sahîha-i şer‘iyye ile vekîl olduğu zât-ı mezbûreyi bi’l-ma‘rifeti’ş-şerîfe ârifân el-Hâc Mehmed Ali Ağa b. Mehmed Salih ve Kayıkçı Ali b. Mehmed nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan İlyas Bey b. Süleyman muvâcehesinde müvekkile-i mezbûre Kâmile Hatun işbu târîh-i i‘lâmdan bir buçuk sene mukaddem malımdan ve yedimden iktirâz ve kabz ve umûruna sarfla istihlâk edip zimmetinde alacak hakkım olan on bin guruşun yedi bin guruşunu müvekkile-i mezbûre Kâmile Hatun bana edâ ve teslîm edip bâkīsi olan üç bin guruşu ve ben müvekkile-i mezbûre Kâmile Hatun’un İstanbul’da Kantarcılar nâm mahâlde Şerbetçi sokağında vâki‘ menzilinde müsâfiren sâkin iken müvekkile-i mezbûrenin bi-şarti’r-rücû‘ emriyle on iki ay müddetde müvekkile-i merkūme için tabh etdirdip kendüye teslîm eylediğim ta‘âm ve nân-ı azîz semenlerine malımdan bâ-defter-i müfredât medfû‘um olup müvekkile-i mezbûre zimmetinde bi’l-mürâca‘a alacak hakkım olan bin altı yüz seksen guruş ki cem‘an dört bin altı yüz guruşu müvekkile-i mezbûreye izâfetle vekîl-i mezbûr İlyas Bey’den hâlâ taleb ederim deyü tasaddî eylediğim da‘vâmdan bâ-tavassut-ı muslihûn vekîl-i mezbûr İlyas Bey ile bi’t-tav‘ ve’r-rızâ işbu yüz guruş üzerine sulh olduğumda ol dahi sulh-ı mezkûru müvekkile-i mezbûreye izâfetle kabûl ve bedel-i sulh-ı mezkûr bin beş yüz guruşu müvekkilesi mezbûrenin malından olarak işbu meclis-i şer‘de bana bi’l-vekâle def‘ ü teslîm eylediğinde ben dahi yedinden tamâmen ve kâmilen ahz ü kabz etmemle bi’l-cümle husûs-ı mezkûrlara müte‘allıka âmme-i de‘âvîden müvekkile-i mezbûre Kâmile Hatun’un zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ibrâ-i mezkûrumu bi’l-vekâle kabûl edip külliyen kat‘-ı münâza‘a eyledik deyü müdde‘î-i mezbûr Mehmed Rıfat Efendi’nin sâdır olan bi’l-cümle takrîr-i meşrûhunu vekîl-i mezbûr İlyas Bey bi’l-vekâle tahkīk ve tasdîk eylediği tescîl ve huzûr-ı [âlîlerine i‘lâm olundu]. Fî 12 R sene [12]74. Mustafa.