Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 148 Hüküm no: 124 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Zehra Hatun’un Şefika Hatun aleyhindeki elmas küpe davasından men olunması Nallımescidli Mustafa Çavuş kaydıyla Çarşambalı Ahmed Çavuş’a teslîm. Ma‘rûz, İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Kumrulu Mescid nâm-ı diğer Mi‘mârsinan mahâllesinde sâkine sâhibe-i arzuhâl mu‘arrefetü’z-zât Fâtımatüzzehra Hatun bt. Ali mahfil-i şer‘iyyâtda yine câmi‘-i şerîf-i müşârün-ileyh civârında Pirinçci Sinan mahâllesinde sâkine derûn-ı arzuhâlde mezkûretü’l-ism kezâlik mu‘arrefetü’z-zât Şefika Hatun bt. Mustafa muvâcehesinde malım olup işbu meclis-i şer‘de mu‘âyene olunan sîm üzerine masnû‘ bir tek elmaslıca küpeyi ben sene-i sâbıkā ya‘ni bin iki yüz yetmiş üç senesi Şevvâli’l-mükerreminin dördüncü günü yedimden kazâen zâyi‘ edip işbu mezbûre Şefika Hatun’un yedinde bulmamla bi’l-istihkāk taleb ederim deyü da‘vâ ettikde ol dahi cevâbında zikr olunan elmas küpe benim âhardan müşterâ yedimde malım ve mülkümdür deyüp müdde‘iye-i mezbûre Fâtımatüzzehra Hatun’un ber-minvâl-i muharrer müdde‘âsını ba‘de’l-inkâr müdde‘iye-i merkūme Fâtımatüzzehra Hatun ber-vech-i meşrûh müdde‘âsını isbâtdan izhâr-ı acz edip istihlâf etdikde mezbûre Şefika Hatun bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre Fâtımatüzzehra Hatun da‘vâ-i mezkûresiyle mezbûre Şefika Hatun’a bilâ-beyyine mu‘ârazadan men‘ olunduğu tescîl ve huzûr-ı [âlîlerine i‘lâm olundu]. Fî 17 R sene [12]74.