Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 148 Hüküm no: 125 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Behiye Hanım’ın Mehmed Ağa’dan muhalaa usulüyle boşanması Yatağan Çeşmeli Osman Çavuş’a teslîm şüd. Medîne-i hazret-i Ebâ Eyyûbe’l-ensârî -radıye anhü Rabbihi’l-bârî- mahâllâtından Kızılmescid mahâllesinde sâkine sâhibe-i arzuhâl mu‘arrefetü’z-zât Havva Behiye Hanım bt. Ahmed mahfil-i şer‘iyyâtda zevc-i muhâlı‘ı derûn-ı arzuhâlde mezkûrü’l-ism Mehmed Ağa b. İbrahim muvâcehesinde mezbûr Mehmed Ağa bin guruş mehr-i mu‘accel ve bin bir guruş mehr-i müeccel tesmiyeleriyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i mu‘accel-i mezkûr hakkım olan bin guruşun sekiz yüz guruşunu mezbûr Mehmed Ağa bana edâ ve teslîme ba‘de’t-ta‘ahhüd bâkīsi olan iki yüz guruş ve mehr-i müeccel-i mezkûr hakkım olan bin bir guruş ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Ağa ile muhâla‘a sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl bana edâ ve teslîme müte‘ahhid olduğu meblağ-ı mezkûr sekiz yüz guruş ile mezbûr Mehmed Ağa’nın yedinde emâneten malım olan mecmû‘u beş yüz guruş kıymetli beş basma anteri ma‘a şalvar ve yedi basma hırka ve bir şalâkiye kaplı cedîd nâfe kürk ve bir buçuk zirâ‘ lâciverdî Lahor şal ve bir İngiliz-kârî şal ve siyâh şalâkî anteri ma‘a şalvar ve dördü tül ve üçü dülbend yedi gömlek ve bir yaşmak ve bir Merinoz ferâce ve beş yazma yemenî ma‘a oya ve on bayağı yemenî ve bir hamam tası ve bir baş tarağı ve bir çift na‘lin ve bir çift terlik ve bir lasdik kemer ve bir mâvi ihrâm ve bir mâ’î yatak bağı ve bir yün memlû döşek ve bir penbe memlû basma şilte ve bir basma yorgan ma‘a çarşeb ve iki yatak çarşebi ve iki baş yasdığı ve iki yüz yasdığı ve bir yeşil saplı yemek kaşığı ve iki basma boğça ve bir zirâ‘ atlas ve bir zirâ‘ Merinoz ve üç zirâ‘ basma ve bir ceviz çekmece ve bir sepet sandık ve bir gergefdan mâ‘adâ hukūk-ı zevciyete ve ibtidâ-yı zevciyetimizden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvîden tarafeynden her birimiz âharın zimmetini ibrâ-i sahîh-i şer‘î ile [25b] ibrâ ve iskāt ve her birimiz ber-minvâl-i muharrer âharın ibrâsını kabûl eyledik deyü mukırra-i mezbûre Havva Behiye Hanım’ın sâdıra olan bi’l-cümle kelimât-ı meşrûhasını mezbûr Mehmed Ağa tasdîk ve tahkīk eylediği huzûr-ı [âlîlerine i‘lâm olundu]. Fî 18 Rebî‘ülâhir sene [1]274. Hasan.