Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 149 Hüküm no: 126 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Yuvan’ın, Covanni v. Yuvan aleyhindeki tarla ve bahçe davasında anlaşma sağlanması Postabaşı Zeyrekli Süleyman Kavvâs kaydıyla Tophaneli Numan Kavvâs’a teslîm. Ma‘rûz, Vilâyet-i Rumeli’de İşkodra sancağına tâbi‘ Bar kasabası <> kurâsından İspiç karyesi ahâlîsinden ve Devlet-i aliyye teba‘asının Rum milletinden arzuhâl eden Bahçivan Andon v. el-müteveffâ Yuvan mahfil-i şer‘iyyâtda yine karye-i mezkûre ahâlîsinden ve tâife-i merkūmeden olup zikirleri âtî bahçe ve tarlaya vaz‘-ı yedi şer‘an sâbit ve mütehakkık olan yine Devlet-i aliyye teba‘asının Rum milletinden derûn-ı arzuhâlde mezkûrü’l-ism Covanni v. Yuvan muvâcehesinde babam ve mûrisimiz müteveffâ-yı merkūm Yuvan <> hayâtında merkūm Havva’nın malından ve yedinden iktirâz ve kabz ve umûruna sarfla istihlâk eylediği bin sekiz yüz guruş deyni mukābelesinde yedinde malı ve mülkü olan karye-i mezkûre hudûdu dâhilinde vâki‘ etrâf-ı erba‘ası merkūm Covanni’nin dut bahçesi ve Sava v. Hıristo v. Adam tarlası ve benim kır ve lağım ve tarîk ile mahdûd eşcâr-ı müsmire ve gayr-ı müsmireli tahmînen bir dönüm mikdârı bir kıt‘a mülk bahçesini merkūm Covanni’ye rehin vaz‘ ve bâ-temessük-i sâhib-i arz müstakillen taht-ı tasarrufunda olan karye-i mezkûre hudûdu dâhilinde vâki‘ bir tarafdan Hıristo Çoro tarlası ve bir tarafdan Andon v. Yuvan koruluğu ve bir tarafdan Cuvan v. Yuvan menzili ve tarlası ve taraf-ı râbi‘i tarîk-i âm ile mahdûd tahmînen yarım keyl tohum istî‘âb eder bir kıt‘a tarlasını bâ-re’y-i sâhib-i arz vefâen ferâğ ve tefvîz ve mecmû‘unu teslîm eylediğinde ol dahi ber-minvâl-i muharrer irtihân ve tefevvüz ve tesellüm ve kabz ve kabûl etdikden sonra deyn-i meblağ-ı mezkûru dâyini merkūm Covanni’ye edâ ve zikr olunan bahçe ve tarlayı istihlâs etmeksizin babam merkūm Yuvan fevt olup ve bahçe-i mahdûd-ı mezkûr bana mevrûs ve tarla-yı mahdûd-ı mezkûr dahi âdiyen bana müntakil olmağla el-hâletü hâzihi deyn-i meblağ-ı mezkûr bin sekiz yüz guruşu yedimden ahz ü kabz birle bahçe ve tarla-yı mezkûrlardan bâ-re’y-i sâhib-i [arz] keff-i [yed] ve mahâllerinde bana teslîme merkūm Covanni’ye tenbîh murâdımdır deyü da‘vâ eylediğimde, ol dahi cevâbında bahçe ve tarla-yı mezkûrlara el-yevm vaz‘-ı yedini ikrâr edip lâkin yedimde olup bin iki yüz altmış dört senesi Rebî‘ülevveli’nin sekizinci günü târîhiyle müverraha işbu bir [kıt‘a] hüccet-i şer‘iyye nâtıka olduğu üzere baban müteveffâ-yı merkūm Yuvan sağlığında bahçe-i mahdûde-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bin sekiz yüz guruş semen-i medfû‘ ve makbûza bana bey‘ ve temlîk ve tarla-yı mahdûd-ı mezkûreyi dahi hüsn-i rızâ ve tayyib-i ihtiyârı ve ferâğ-ı kat‘î-i mu‘teber ile bâ-re’y-i sâhib-i arz bana meccânen ferâğ ve tefvîz ve her birini teslîm eylediğinde ben dahi ber-vech-i muharrer iştirâ ve temellük ve tefevvüz ve tesellüm ve kabz ve kabûl etmiş idim deyü eylediği def‘ini ve mazmûn-ı hüccet-i mezkûreyi ben bi-tamâmihâ tâyi‘an ve kat‘iyyen ikrâr u i‘tirâf ve tasdîk eylediğimden sonra merkūm Covanni rızâsıyla bana teberru‘an malından altı bin guruş def‘ ü teslîm ve umûruma sarfla istihlâke emr eylediğinde ben dahi yedinden ahz ü kabz ve emriyle umûruma sarfla istihlâk etmemle bi’l-cümle husûs-ı mezkûre müte‘allıka âmme-i da‘vâdan merkūm Covanni’nin zimmetini ibrâ-i âmm-ı sahîh-i şer‘î ile kabûlünü hâvî ibrâ ve iskāt eylediğimde ol dahi medfû‘u olan meblağ-ı müstehlek-i merkūmun istirdâdına müte‘allıka da‘vâdan benim zimmetimi kabûlümü hâvî ibrâ ve iskāt eylediğinden sonra ben malımdan işbu meclis-i şer‘de merkūm Covanni’ye altı bin guruş ikrâz ve teslîm eylediğimde ol dahi yedimden iktirâz ve kabz ü kabûl ve meblağ-ı mezkûr altı bin guruşu cihet-i mezkûreden zimmetinde sahîhan bana deyni olduğunu tâyi‘an ikrâr u i‘tirâf ve çend rûz zarfında bana edâ ve teslîme ta‘ahhüd eyledi deyü müdde‘î-i mukırr-ı merkūm Andon’un bi’l-cümle kelimât-ı meşrûhasını merkūm Covanni tahkīk ve tasdîk eylediği tescîl ve huzûr-ı [âlîlerine i‘lâm olundu]. Fî 29 Ra sene [12]74 Hasan.