Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 158 Hüküm no: 133 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kayıkçı İbrahim Ağa’nın oğlu Canbaz İsmail’in, Emine Hatun aleyhindeki miras davasından men olunması Kocamustafapaşalı Raşid Çavuş’a teslîm Ma‘rûz, İstanbul’da Davudpaşa İskelesi kurbünde Bâyezid-i cedîd mahâllesi ahâlîsinden olup sevâhil-i Bahr-ı sefîd’de Kal‘a-i sultâniye’de sâkin iken işbu sene-i mübâreke Saferi’l-hayrının yirmi yedinci günü vefât eden Kayıkçı İbrahim Ağa b. Hasan b. Abdullah’ın verâseti zevce-i menkûha-i metrûkeleri Emine Hatun bt. Ebubekir ve Ruveyde Hatun bt. Abdullah ile zevce-i uhrâsından mütevellid sulbî kebîr oğlu canbaz esnâfından İsmail’e münhasıra, ba‘dehû zevce-i mezbûre Ruveyde Hatun dahi sene-i mübâreke-i mezkûre şehr-i Rebî‘ülevveli’nin beşinci günü vefât edip verâseti li-ebeveyn kız karındaşı Kal‘a-i mezbûrede sâkine gāibetü ani’l-beled diğer Emine Hatun’a münhasıra ve tashîh-i mesele-i mîrâsları bi-tarîkı’l-münâsahati’ş-şer‘iyye on altı sehmden olup sihâm-ı mezkûreden bir sehmi zevce-i mezbûre Emine Hatun’a ve on dört sehmi mezbûr İsmail’e ve bir sehmi dahi gāibe-i merkūme diğer Emine Hatun’a isâbeti tahakkukundan sonra verese-i mezbûrûndan sâhib-i arzuhâl mezbûr İsmail mahfil-i şer‘iyyâtda derûn-ı arzuhâlde mezkûretü’l-ism mu‘arrefetü’z-zât zevce-i mezbûre Emine Hatun muvâcehesinde babam ve mûrisimiz müteveffâ-yı evvel-i mezbûr İbrahim Ağa hayâtında yedinde malı olan on bin sekiz yüz kırk guruş nakdi ile mecmû‘u iki bin iki yüz otuz beş guruş kıymetli yün memlû üç çit döşek ve dört basma yorgan ve sekiz çözme? çarşeb ve bir nühâs mangal ve dört sahan ma‘a kapak ve iki kadayıf tepsisi ve sagīr ve kebîr üç tencere ve iki hilâlî koyun sâ‘ati ve bir acem şalı ve bir kahve değirmenini ve mâlik olduğu bin beş yüz guruş kıymetli dört çifte piyâde ta‘bîr olunur bir kebîrce kayığı derûnuna vaz‘ birle ve zevceleri mezbûretân dahi babam mezbûr ile kayık-ı mezkûra râkiben mârrü’z-zikr Kal‘a-i sultâniye’ye âzimler olup savb-ı mezkûre vusûllerinden sonra babam müteveffâ-yı evvel-i merkūm fevt olmuş idi. Lâkin babam ve mûrisimiz müteveffâ-yı evvel-i merkūmun hîn-i fevtinde nakd-i merkūm ile eşyâ ve evânî-i nühâsiye-i muharrere-i merkūme kimin vaz‘-ı yedinde kaldığı ma‘lûmum değil ise de mücerred mezbûre Emine Hatun zevce-i menkûha-i metrûkesi bulunduğuna binâen nakd-i merkūm ile eşyâ ve evânî-i nühâsiye-i muharrere ve kayık-ı mezkûrdan ber-mûceb-i münâsaha-i mezkûre on dört sehim hisse-i ırsiyemi bana vermek üzere zevce-i mezbûre Emine Hatun’a cebr ve tenbîh olunmak murâdımdır deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendüye tefhîm ve mûcebince da‘vâ-i mezkûresiyle zevce-i mezbûre Emine Hatun’a bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 18 Ca sene [12]74. Nazif.