Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 159 Hüküm no: 134 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hanım’ın eşi Mehmed Şevki Bey’de olan mehr-i muaccelinin tahsil olunması Arz Odası memûru Erzincanlı Ahmed Çavuş kaydıyla Aksaraylı İsmail Çavuş’a teslîm şüd. Mahrûse-i Galata’ya muzâfe kasaba-i Tophane’de Ali Avni Efendi mahâllesinde sâkine sâhibe-i arzuhâl mu‘arrefetü’z-zât Şerîfe Zeyneb Hanım bt. es-Seyyid Bilal mahfil-i şer‘iyyâtda hâlâ zevci Enderûn-ı hümâyûn hademesinden derûn-ı arzuhâlde mezkûrü’l-ism Mehmed Şevki Bey b. el-Hâc Mehmed İzzet muvâcehesinde merkūm Mehmed Şevki Bey bin guruş mehr-i müeccel ve bin guruş mehr-i mu‘accel tesmiyeleriyle zevc-i dâhilim olup, lâkin mehr-i mu‘accel-i mezkûr bin guruşu henüz bana edâ ve îfâ etmemekle suâl olunup mehr-i mu‘accel-i mezkûr bin guruşu bana edâya zevcim merkūm Mehmed Şevki Bey’e tenbîh olunmak matlûbumdur deyü ba‘de’d-da‘vâ ve’l-istintâk, ol dahi cevâbında müdde‘iye-i mezbûre Şerîfe Zeyneb Hanım ol mikdâr guruş mehr-i müeccel ve mehr-i mu‘accel tesmiyeleriyle zevce-i menkûha-i medhûlün-bihâsı olup ve mehr-i mu‘accel-i mezbûr bin guruş zimmetinde müdde‘iye-i mezbûre Şerîfe Zeynem Hanım’a sahîhan deyni olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince mehr-i mu‘accel-i mezkûr bin guruşu müdde‘iye-i mezbûre Şerîfe Zeyneb Hanım’a bi’t-taleb edâsıyla merkūm Mehmed Şevki Bey ilzâm olunduğu huzûr-ı [âlîlerine i‘lâm olundu]. Fî 18 Ca sene [12]74. Emin.