Bab Mahkemesi 54 Numaralı Sicil (H. 1102 / M. 1691) cilt: 20, sayfa: 116 Hüküm no: 96 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hacı Receb ile eski kocası Seyyid Hüseyin Çelebi b. Mehmed’in birbirlerinin zimmetlerini ibra etmesi Mahmiye-i İstanbul’da Manisalı Çelebi mahallesinde sâkine olup zâtı el-Hâc Mustafa b. Veli ve Süleyman b. Mevlid nâm kimesneler ta‘rîfleriyle mu‘arrefe olan Hatice bt. el-Hâc Receb nâm hâtun meclis-i şer‘-i şerîf-i enverde, zevc-i sâbıkı bâ‘isü hâze’l-kitâb es-Seyyid Hüseyin Çelebi b. Mehmed mahzarında ikrâr ve takrîr-i kelâm edip, zevcim mezbûr es-Seyyid Hüseyin Çelebi talâk-ı selâse ile tatlîk etmekle, zimmetinde mütekarrir ve ma‘kūdun aleyh olan elli guruş ve yüz akçenin otuz üç guruşunu beynimizde ma‘lûm kürk semeninden kendiye deynim olan otuz üç guruşa takās ve on iki buçuk guruş olmak üzre zimmetimde hakkı olan beş Frengî altınından beş guruşunu bana hibe edip, bâkī yedi buçuk guruşunu dahi mehr-i mezbûr bin yedi buçuk guruşuna takās, mezbûr es-Seyyid Hüseyin Çelebi dahi mukāssa ve kabûl edip, mehr-i mezbûrdan bâkī on guruş ve yüz akçe ve nafaka-i iddet ve me’ûnet-i süknâm için bi’t-terâzî dokuz yüz akçe ki, cem‘an iki bin iki yüz akçeyi mezbûr es-Seyyid Hüseyin Çelebi bana edâya ta‘ahhüd edip ve kendinde olan bin akçe kıymetli bir kırmızı nîmten mukābelesinde bana işbu kaftanı verip, ben dahi kabz ve kabûl eyledim. Ba‘de’l-yevm hukūk-ı zevciyyete müte‘allika meblağ-ı mezbûr iki [bin] iki yüz akçeden mâ‘adâ biribirimiz ile da‘vâ ve münâza‘amız kalmadı dedikde, gıbbe’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel sene 1102. Şuhûdü’l-hâl: El-Hâc Mustafa b. Veli, Mehmed Efendi b. ( ) el-imâm, Hüseyin Çelebi b. Mevlid, Mehmed Beşe b. Hasan, Hüseyin Çelebi b. ( ), Hasan Çelebi b. ( ).