Bab Mahkemesi 54 Numaralı Sicil (H. 1102 / M. 1691) cilt: 20, sayfa: 117 Hüküm no: 97 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın varislerinin Mustafa Efendi b. Yusuf’tan alacaklarını tahsil ettikleri Mahrûse-i Galata’da Bereketzâde mahallesinde sâkin iken bundan akdem vefât eden Çenez? Mehmed Çelebi b. Mustafa’nın verâseti, zevce-i metrûkesi Ayşe bt. Osman ile li ebeveyn kız karındaşı Safiye hâtunlara münhasıra olduğu şer‘an zâhir ve müte‘ayyin oldukdan sonra mezbûre Safiye Hâtun kendi tarafından asâleten ve mezbûre Ayşe Hâtun tarafından husûs-ı âti’l-beyânı ikrâra vekîl olmağla vekâleten meclis-i şer‘-i şerîf-i enverde ve mahfil-i dîn-i münîf-i ezherde, sâbıkan matbah emîni olan fahrü’l-eşbâh Mustafa Efendi b. Yusuf tarafından husûs-ı âti’l-beyâna vekîl-i şer‘î olan Abdullah Efendi b. Mehmed mahzarında asâleten ve vekâleten ikrâr ve takrîr-i kelâm edip, karındaşım müteveffâ-yı mezbûr Mehmed Çelebi’nin mezbûrun müvekkili mûmâ-ileyh Mustafa Efendi’nin tarafından hizmetinde olmağla, …? değirmenini nâzır olduğu vakitte mûmâ-ileyh Mustafa Efendi zimmetinde [ve] beynlerinde vezni ma‘lûm revgan-ı zeyt semeninden olan altı bin dört yüz doksan sekiz akçe hakkı olup, kable’l-ahz fevt olup müteveffâ-yı mezbûrun terekesi bi hasebi’l-irsi’ş-şer‘î bize isâbet edip, meblağ-ı mezbûr tereke-i müteveffâ-yı mezbûrdan olmağın, bundan akdem meblağ-ı mezbûra mûmâ-ileyh Mustafa Efendi’den bi’l-asâle ve bi’l-vekâle taleb ve da‘vâ ettiğimde, ol dahi inkâr etmekle, beynimizde münâza‘ât-ı kesîre vukū‘undan sonra da‘vâ-yı mezbûrumdan mûmâ-ileyh Mustafa Efendi benim ile yedi bin akçe üzerine sulh oldukda, ben dahi asâleten [ve] vekâleten sulh-ı mezbûru kabûl ve bedel-i sulh olan meblağ-ı mezbûr yedi bin akçeyi mûmâ-ileyh Mustafa Efendi yedinden bi’t-tamâm ve’l-kemâl ahz u kabz edip, ba‘de’l-yevm husûs-ı mezbûra ve ziyâdeye müte‘allika âmme-i da‘vâdan mûmâ-ileyh Mustafa Efendi’nin ve gerek kethüdâsı gāib ani’l-meclis Mehmed Ağa b. Mahmud’un zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim. Ba‘de’l-yevm benim ve müvekkilim mezbûre Ayşe’nin mûmâ-ileyh [Mustafa] Efendi’nin yedinde ve zimmetlerinde bir akçe ve bir habbe husûs-ı mezbûra müte‘allika da‘vâ ve nizâ‘ımız kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Halil Ağa b. İbrahim, Ahmed Ağa b. Abdi, Ahmed Efendi b. Ramazan, Osman Çelebi b. Ali, Ahmed Ağa b. Mahmud ve gayruhüm.