Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 159 Hüküm no: 135 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Merkad’ın Terzi Agob’da olan alacağının mahkeme kararıyla tahsil olunması Mehter? Kethüdâsı Hasan Ağa’ya teslîm şüd. Vilâyet-i Rumeli’de Gelibolu kazâsı ahâlîsinden ve Devlet-i aliyye teba‘asından Yahûdî milletinden arzuhâl eden Merkado v. Yuda nâm tâcir mahfil-i şer‘iyyâtda yine kazâ-i mezbûr ahâlîsinden ve teba‘a-i Devlet-i aliyye’nin Ermeni milletinden derûn-ı arzuhâlde ismi mezkûr Terzi Agob v. Bedros muvâcehesinde yedimde olup sene-i sâbıkā yani bin iki yüz yetmiş üç senesi şehr-i Rebî‘ülâhiri’nin on birinci günü târîhiyle müverrah ve ol târîhde Kal‘a-i Sultâniye nâibi bulunan eşrâf-ı kuzâtdan meveddetlü Abdullah Hilmi Efendi’nin hatemiyle mahtûm işbu bir kıt‘a i‘lâm-ı şer‘î nâtık olduğu üzere merkūm Agob zimmetinde cihet-i karzdan bâ-tahvîl beş bin guruş alacak hakkım olup hattâ merkūm Agob târîh-i i‘lâm-ı mezkûrdan on gün mukaddem Kal‘a-i Sultâniye’de kâin İzmirli Barto Bazergân’ın mağazası önünde ber-mantûk-ı tahvîl-i mezkûr cihet-i merkūmeden ol mikdâr guruş bana zimmetinde sahîhan deyni olduğunu mahzar-ı şuhûdda tav‘an ikrâr u i‘tirâf dahi etmiş iken meblağ-ı merkūm beş bin guruşu bana edâ ve teslîmden ibâ vü imtinâ‘ eylediğine binâen ben târîh-i i‘lâm-ı mezkûrda mârrü’z-zikr Kal‘a-i Sultâniye Mahkemesi’nde nâib-i mûmâ-ileyh huzûrunda ma‘kūd meclis-i şer‘de meblağ-ı mezkûr beş bin guruşu merkūm Agob’dan da‘vâ eylediğimde, ol dahi cevâbında meblağ-ı merkūm beş bin guruşu cihet-i merkūmeden mukaddemâ zimmetinde bana deyni olduğunu ikrâr lâkin ben deynim olan meblağ-ı merkūm beş bin guruşu ceste ceste sana edâ ve îfâ etmiş idim deyüp benim ber-minvâl-i muharrer muahhar târîhle ikrâr-ı kat‘î-i mezkûr müdde‘âmı ba‘de’l-inkâr ben ber-vech-i meşrûh muahhar târîhle ikrâr-ı meşrûh müdde‘âmı lede’t-tezkiye adl ve makbûlü’ş-şehâde idükleri ihbâr olunan kal‘a-i mezkûre ahâlîsinden Mehmed b. Hasan ve Mehmed Emin b. Abdullah nâm kimesnelerin bi’l-muvâcehe ber-nehc-i şer‘î eyledikleri şehâdetleriyle ba‘de’l-isbât ve’l-hükm mûcebince nâib-i mûmâ-ileyh meblağ-ı merkūm beş bin guruşu bana edâ ve teslîme merkūm Agob’a tenbîh edip i‘lâm-ı mezkûru dahi yedime i‘tâ etmiş iken medyûnum merkūm Agob meblağ-ı mahkûmün-bih-i mezkûr beş bin guruşu hâlâ bana vermemekle suâl olunup meblağ-ı mahkûmün-bih-i mezkûr beş bin guruşun medyûnum merkūmdan tahsîl ve bana teslîm olunması murâdımdır deyü mazmûn-ı takrîr-i meşrûhuna mutâbık i‘lâm-ı mezkûru ibrâz ve irâe ederek ba‘de’d-da‘vâ ve’l-istintâk merkūm Agob dahi cevâbında hâl vech-i meşrûh üzere olduğunu ve mazmûn-ı i‘lâm-ı mezkûru bi-tamâmihî tâyi‘an ve kat‘iyyen ikrâr u i‘tirâf edip fakat şâhidân-ı mezbûrânın şâhid-i zûr oldukları muahharen ba‘zı kesânın ifâdelerinden meczûmum olmuş olmağla öyle olucak müdde‘î-i merkūm Merkado da‘vâ-i mezkûresini âhar şâhid-i âdil ikāmesiyle be-tekrâr isbât etmedikçe meblağ-ı merkūmu i‘tâ ve teslîmden ibâ vü imtinâ‘ ederim dedikde lede’l-istiftâ merkūm Agob nâib-i mûmâ-ileyhin şâhidân-ı mezbûrânı lede’t-tezkiye hükm eylediğni ve mazmûn-ı i‘lâmı mukır ve mu‘terif iken takrîr-i meşrûhu üzere makām-ı ref‘de îrâd eylediği kelâmı meşrû‘a ve iltifâta şâyân olmadığı kendüye ba‘de’t-tefhîm meblağ-ı mahkûmün-bih-i mezkûr beş bin guruşun medyûn-ı merkūm Agob’dan ber-mantûk-ı i‘lâm-ı şer‘î hâlâ ve tamâmen bi’t-tahsîl müdde‘î-i merkūm Merkado’ya teslîmi şer‘an iktizâ eylediği tescîl ve huzûr-ı [âlîlerine i‘lâm olundu]. Fî 26 Ca sene [12]74. Mustafa.