Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 161 Hüküm no: 136 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kütahyalı Ahmed’in, Yunan tebasından Tahtakale’de esnaf Dimitri ve Yani aleyhinde hırsızlık iddiasında bulunmakdan men olunması Mübâşirine teslîm Ma‘rûz, Asâkir-i Hâssa-i şâhâne Muvazzaf İkinci Alayının Üçüncü Taburunun Sekizinci Bölüğü’nde dördüncü onbaşının ikinci neferi Kütahyavî Ahmed b. Halil nâm kimesne mahfil-i şer‘iyyâtda Yunan Devleti teba‘asından ve İstanbul’da Tahtakale civârında vâki‘ mağazada sâkin mağazacı tâifesinden bâ‘isü’l-i‘lâm Dimitri v. Karayani ve şerîki Yani v. Tanaş muvâcehelerinde Devlet-i müşârün-ileyhâ sefârethânesi tarafından mürsel Kapıoğlanı Corci v. Covanni hâzır olduğu hâlde şerîkân-ı merkūmân işbu târîh-i i‘lâmdan bir gün mukaddem yedimde malım olup bir aded beyaz şalâkî kese derûnunda mevzû‘ olan sekiz aded tâm Mecidiye ve bir nısf Mecidiye ve iki aded Fransız altınlarımı mağaza-i merkūmede fuzûlî ve bi-gayrı hakkın bi’l-ma‘iyye hufyeten ahz ü kabz etmeleriyle suâl olunup mezkûr altınlar mevcûde ise a‘yânını, müstehleke ise ba‘de’s-sübût emsâlini bi-tarîkı’d-damân hâlâ bana edâ ve teslîme şerîkân-ı merkūmân Dimitri ve Yani’ye tenbîh olunmak murâdımdır deyü ba‘de’d-da‘vâ ve’l-istintâk onlar dahi cevâbında külliyen inkâr etmeleriyle müdde‘î-i mezbûr Ahmed ber-minvâl-i muharrer müdde‘âsını isbâtdan izhâr-ı acz birle istihlâf etdikde merkūmân Dimitri ve Yani’ye bi’l-muvâcehe ber-nehc-i şer‘î başka başka yemîn verilmeğin mûcebince müdde‘î-i mezbûr Ahmed da‘vâ-i mezkûresiyle şerîkân-ı merkūmân Dimitri ve Yani’ye bilâ-beyyine mu‘ârazadan men‘ olunduğu tescîl ve mübâşirleri zabtiye neferâtından Kütahyavî Mehmed Ağa kulları yediyle huzûr-ı [âlîlerine i‘lâm olundu]. Fî 22 Ca sene [12]74. Hâfız Akif.