Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 161 Hüküm no: 137 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akıl sağlığını kaybetmiş olan Kurukahveci Mehmed Sadık Ağa’ya Şeyh Mehmed Raşid Efendi’nin vasi tayin olunması Müftü Hamamlı Osman Çavuş kaydıyla Eyüblü Mahmud Çavuş’a teslîm Mahmiye-i İstanbul’da Alaca Hamam civârında Çelebioğlu Alaeddin mahâllesinde sâkin Kurukahveci esnâfından Mehmed Sadık Ağa b. İbrahim b. Abdullah nâm kimesne bundan akdem cünûn-ı mutbık ile mecnûn olup hâl-i sahvına değin emvâlini hıfz ve umûr ve husûsunu idâre ve rü’yete kıbel-i şer‘den bir vasî nasbı lâzım geldiği mecnûn-ı mezkûrun sulbî kebîr oğulları Abdullah Ağa ve İbrahim Ağa nâm kimesneler işbu arzuhâlleriyle bi’l-istid‘â husûs-ı mezkûr Mekteb-i Tıbbiye-i Şâhâne Nâzırı sudûr-ı izâmdan semâhatlü es-Seyyid Mehmed Cemaleddin Efendi hazretleri tarafından bâ-fermân-ı âlî isti‘lâm olundukda fi’l-vâki‘ mezbûr Mehmed Sadık Ağa cünûn-ı mutbık ile mecnûn olup hâl-i sahvına değin bir vasî nasb ü ta‘yîni lâzım geleceği hâmiş-i arzuhâle i‘lâm olunmuş ve hakīkat-i hâl arzuhâl ve i‘lâmda muharrer olduğu üzere idüğü ve işbu hâzır bi’l-meclis es-Seyyid eş-Şeyh Mehmed Raşid Efendi b. Osman nâm kimesne dahi her vechile umûr-ı vesâyeti rü’yete kādir ve ehil ve müstakīm bulunduğu mahâlle-i mezbûre ahâlîsinden udûlden Mehmed Tahir Ağa b. Ali ve Mahmud Ağa b. Abdullah ve Hariciye Kalemi hulefâsından mecnûn-ı merkūmun dâmâdı Mehmed Galib Efendi b. Mehmed Necib ile mezbûrân Abdullah Ağa ve İbrahim Ağa nâm kimesnelerin alâ-tarîkı’ş-şehâde [28a] haberleriyle zâhir ve mütehakkık olduğuna binâen mecnûn-ı mezbûrun hâl-i sahvına değin bi’l-cümle emvâlini hıfz ve umûr u husûsunu idâre ve rü’yete hâzır-ı mezbûr eş-Şeyh Mehmed Raşid Efendi kıbel-i şer‘den vasî nasb ü ta‘yin olundukda ol dahi vesâyet-i merkūmeyi kabûl ve merâsimini kemâ-yenbağī edâya ta‘ahhüd ve iltizâm eylediği tescîl ve mahfil-i şer‘iyyâtdan huzûr-ı [âlîlerine i‘lâm olundu]. Fî 28 Ca sene [12]74. el-Hâc İbrahim