Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 162 Hüküm no: 138 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palu kazasının Yanık Mezra köyü halkından Karabet’in menzil ve dut bahçesini işgal ettiğinden şikâyette bulunduğu Melkon ile anlaşması Kâtib yediyle teslîm Nüsha-i sâniye Ma‘rûz, Fi’l-asl vilâyet-i Anadolu’da Harput sancağına tâbi‘ Palu kazâsı kurâsından Yanık Mezra‘a karyesi sükkânından olup ve el-yevm İstanbul’da Lâleli Câmi‘-i şerîfi kurbünde Yeni Han’da mütemekkin Devlet-i aliyye teba‘asından ve Ermeni milletinden Rençber Karabet v. Manuk mahfil-i şer‘iyyâtda zikri âtî ma‘a bahçe [bir] bâb mülk menzile el-yevm müstakillen vâzı‘u’l-yed olan karye-i mezkûre sükkânından ve Devlet-i aliyye teba‘asından Ermeni milletinden Rençber Melkon v. Bedros muvâcehesinde karye-i mezkûre hudûdu dâhilinde vâki‘ bir tarafdan benim taht-ı temellükümde olan bir kıt‘a dut bahçesi ve bir tarafdan Bağdisar v. İstepan v. Adam’ın dut bahçesi ve bir tarafdan Nabit v. Toros v. Makos’un dut bahçesi ve taraf-ı râbi‘i tarîk-i âm ile mahdûd her biri müstakillen yedimde malım ve mülküm olan derûnunda tahmînen bir dönüm mikdârı kürûmu mülk bir kıt‘a dut bahçesi ile müştemilât-ı sâire-i ma‘lûmeyi hâvî bir bab mülk menzili merkūm Melkon iki seneden beri bi-gayrı hakkın fuzûlî zabt ve hâlâ vaz‘-ı yed eder olmağla suâl olunup menzil ma‘a müştemilât ve bahçe-i mahdûd-ı mezkûrdan keff-i yed ve mahâllinde bana teslîme tenbîh olunmak murâdımdır deyü da‘vâ eylediğimde, ol dahi cevâbında menzil ma‘a müştemilât ve bahçe-i mahdûd-ı mezkûr benim müstakillen malım ve mülküm olduğunu ve menzil ma‘a müştemilât ve bahçe-i mahdûde-i mezkûreye iki seneden beri fuzûlî ve bi-gayrı hakkın vaz‘-ı yedini ikrâr u i‘tirâf ve mûcebince menzil ma‘a müştemilât ve bahçe-i mahdûd-ı mezkûrdan keff-i yed ve mahâllinde bana teslîme merkūm Melkon’a tenbîh olunmuş idi. El-hâletü hâzihi merkūm Melkon menzil ma‘a müştemilât ve bahçe-i mahdûd-ı mezkûrdan keff-i yed ve mahâllinde bana teslîme ta‘ahhüd etmekle bundan mâ‘adâ beynimizde cereyân eden sâir cemî‘ hukūk-ı şer‘iyyeye müte‘allıka âmme-i de‘âvîden her birimiz âharın zimmetini ibrâ-i âmm-ı sahîh-i şer‘î ile kabûle mukārin ibrâ ve iskāt eyledik deyü mukırr-ı merkūm Karabet’in sâdır olan bi’l-cümle takrîr-i meşrûhunu merkūm Melkon tasdîk ve tahkīk eylediği tescîl ve bi’l-cümle huzûr-ı [âlîlerine i‘lâm olundu]. Fî 15 Ca sene [12]74 Emin